L-Assoċjazzjoni tal-Kunsilli Lokali (LCA) Malta qed tmexxi l-proġett Erasmus+ Green Narratives: Rethinking Sustainability Through Human Stories, inizjattiva Ewropea li tlaqqa’ flimkien lill-Assoċjazzjoni tal-Kunsilli Lokali (Malta), l-Institute Advocacy Hub (is-Slovenja) u l-JEDI Movement (is-Serbja) biex tesplora kif ir-rakkontar tal-istejjer jista’ jsaħħaħ l-għarfien dwar is-sostenibbiltà, l-edukazzjoni tal-adulti u l-azzjoni fil-komunità.
Il-proġett, li se jibqa’ għaddej minn Ġunju 2026 sa Awwissu 2027, għandu l-għan li jżid l-għarfien soċjoekoloġiku fost l-adulti, jiżviluppa Green Toolbox of Change, jispira mikroazzjonijiet immexxija mill-komunità u jaqsam l-esperjenzi u r-riżultati li jinħolqu permezz tal-proġett.
Mill-Istejjer tal-Bniedem għall-Azzjoni fil-Komunità
Fil-qalba ta’ Green Narratives hemm it-twemmin li s-sostenibbiltà ssir aktar sinifikanti meta tkun marbuta ma’ nies reali, esperjenzi reali u komunitajiet reali.
Minflok ma l-kwistjonijiet ambjentali jiġu kkomunikati biss permezz ta’ politiki, miri u informazzjoni teknika, il-proġett se jiġbor u jaqsam Stejjer Umani li juru kif individwi u komunitajiet wieġbu għall-isfidi ambjentali u dawk relatati mas-sostenibbiltà.
Dawn l-istejjer se jiġu esplorati permezz ta’ Sustainability Story Evenings, immexxija mill-Institute Advocacy Hub fis-Slovenja, fejn il-parteċipanti se jaqsmu l-esperjenzi tagħhom, jiddiskutu l-isfidi ambjentali u jikkunsidraw kif inizjattivi pożittivi jistgħu jispiraw azzjoni f’komunitajiet oħra.
Riżultat ewlieni ieħor se jkun il-Green Toolbox of Change, immexxi mill-JEDI Movement fis-Serbja. It-Toolbox se jkun riżors interattiv, kemm f’format fiżiku kif ukoll diġitali, maħsub biex jinkoraġġixxi d-diskussjoni, it-tagħlim u l-azzjoni dwar is-sostenibbiltà.
Sussegwentement, it-Toolbox se jiġi applikat fil-prattika permezz ta’ attivitajiet interattivi, mentoring u mikroazzjonijiet fil-komunità, biex il-parteċipanti jkunu jistgħu jgħaddu mill-għarfien u d-diskussjoni għal azzjoni konkreta fi ħdan il-komunitajiet tagħhom stess. L-esperjenzi li jinħolqu se jiġu dokumentati wkoll bħala stejjer ta’ suċċess.
Malta tmexxi s-Sħubija Ewropea
L-Assoċjazzjoni tal-Kunsilli Lokali qed tmexxi l-ġestjoni u l-koordinazzjoni ġenerali tal-proġett, inkluż ir-rappurtar finanzjarju u narrattiv, il-monitoraġġ u l-komunikazzjoni. L-LCA qed tmexxi wkoll id-Disseminazzjoni u Segwitu tal-proġett, inkluż l-istrateġija ta’ komunikazzjoni, il-Green Narrative Evenings, kif ukoll is-sostenibbiltà u l-użu kontinwu tar-riżultati tal-proġett.
Is-sħubija tlaqqa’ flimkien kompetenzi komplementari: Malta tmexxi l-koordinazzjoni, id-disseminazzjoni u l-involviment lokali; is-Slovenja tmexxi l-metodoloġija, l-assigurazzjoni tal-kwalità u s-Story Evenings; filwaqt li s-Serbja tmexxi l-iżvilupp, il-produzzjoni u l-ħolqien tal-kontenut tat-Toolbox.
Sejħa għal Green Narratives – Għidulna l-Istorja Tiegħek
Bħala parti minn Green Narratives, l-LCA qed tistieden lill-Kunsilli Lokali u Reġjonali, lill-NGOs, lill-organizzazzjonijiet volontarji, lill-gruppi tal-komunità, lill-iskejjel u lir-residenti madwar Malta u Għawdex biex jaqsmu inizjattivi u esperjenzi relatati mas-sostenibbiltà li jistħoqqilhom ikunu magħrufa.
Irridu nisimgħu dwar inizjattivi li għamlu, jew qed jagħmlu, differenza pożittiva fi ħdan komunità. Dawn jistgħu jinkludu t-tħaddir urban u l-ispazji miftuħa, it-tnaqqis u l-użu mill-ġdid tal-iskart, il-mobbiltà sostenibbli, il-bijodiversità, l-edukazzjoni ambjentali, il-ġonna komunitarji, il-konsum responsabbli, jew kwalunkwe inizjattiva ambjentali oħra mmexxija lokalment.
L-inizjattiva m’għandhiex għalfejn tkun waħda kbira. Azzjoni żgħira tista’ tagħmel differenza sinifikanti u, meta l-istorja tagħha tinqasam, tista’ tispira komunità oħra biex tieħu azzjoni.
Jekk implimentajt inizjattiva ekoloġika, ipparteċipajt f’waħda, jew għandek storja ta’ sostenibbiltà mill-komunità tiegħek li jistħoqqilha aktar viżibbiltà, irridu nisimgħu mingħandek.
Ibgħat il-Green Narrative tiegħek jew espressjoni ta’ interess lil [email protected].
Permezz ta’ Green Narratives, it-tliet organizzazzjonijiet imsieħba għandhom l-għan li jittrasformaw l-istejjer f’tagħlim, it-tagħlim f’azzjoni, u l-azzjoni lokali f’ispirazzjoni għall-komunitajiet madwar l-Ewropa.