L-atleta Malti, Beppe Grillo, ġie eliminat mill-100 metru meta fis-sitt heat tar-round preliminari huwa spiċċa fil-ħames post minn tmiem parteċipanti.
Din it-tellieqa ntrebħet mill-atleta mill-Panama, Arturo Deliser Espinosa, f’ħin ta’ 10.34 sekondi, segwit minn dak ta’ Seychelles, Dylan Sicobo (10.51) u ta’ Gabon, Wissy Frank Moukoula (10.59).
Il-ħin ta’ Grillo kien dak ta’ 10.69 sekondi meta daħal ras imb’ras mal-atleta ta’ Surinam, Jalen Lisse, iżda dan tal-aħħar kien 0.05 ta’ sekonda aktar veloċi.
Huwa ried jiġi fl-ewwel żewġ postijiet biex jassigura postu fl-ewwel round ta’ din il-kompetizzjoni.
Grillo kellu ħruġ tajjeb iżda mal-ewwel 20 metri huwa waqa’ lura biex f’dik id-distanza qasira tal-korsa mill-ewwel deher li ma kienx se jagħmilha.
Peró mill-pożittiv huwa kompla jissielet biex ħalla tliet atleti warajh.
B’kollox, il-Malti ġie klassifikat fl-24 post minn 45 atleta.
B’hekk ġiet fi tmiemha l-parteċipazzjonio Maltija, f’Pariġi 2024.
Dan wara li Katryna Esposito ħadet sehem fil-judo, Gianluca Chetcuti ħa sehem fit-Trap tal-isparar u l-għawwiema Sasha Gatt ipparteċipat fl-1500 metru freestyle u Kyle Micallef fil-50 metru freestyle.
Fil-veritá, ma tantx kelhom prestazzjonijiet tajbin minħabba li ġew eliminati mill-ewwel.
