Il-Federazzjoni Taljana tal-Futbol (FIGC) ħabbret diversi deċiżjonijiet wara l-laqgħa tal-Kunsill Federali li saret f’Ruma. Fost l-aktar deċiżjonijiet importanti hemm bidla fid-data tal-bidu tas-suq tat-trasferimenti tax-xitwa għall-istaġun 2026/27. Fuq talba tal-Lega Serie A, u bl-appoġġ tal-Lega Serie B u Serie C, il-Kunsill approva li t-tieni perjodu tas-suq jibda fit-28 ta’ Diċembru 2026 minflok fl-1 ta’ Jannar. Madankollu, il-bidla għadha trid tiġi approvata mill-FIFA qabel ma ssir operattiva.
Il-Kunsill iddiskuta wkoll il-preparazzjonijiet għall-EURO 2032, li l-Italja se tospita flimkien mat-Turkija.
Il-FIGC se tibgħat lill-UEFA, sat-30 ta’ Settembru, id-dokumentazzjoni dwar is-sedi meqjusa xierqa biex jospitaw il-logħbiet. Il-UEFA mbagħad se tivverifika jekk id-dossiers jissodisfawx ir-rekwiżiti meħtieġa.
Wara dan il-proċess, il-FIGC se tagħżel il-ħames sedi li se jospitaw il-logħbiet tal-Kampjonat Ewropew. Il-Federazzjoni qalet ukoll li se tkompli taħdem mal-awtoritajiet kollha biex tgħin fl-iżvilupp u l-immodernizzar tal-infrastruttura tal-football Taljan.
Deċiżjoni oħra kienet l-estensjoni tal-applikazzjoni ta’ artiklu tar-regolamenti tal-football Taljan għall-kampjonat tas-Serie D, wara talbiet minn bliet li ma setgħux jirreġistraw il-clubs tagħhom.
Il-Kunsill approva wkoll regolament ġdid għal Club Italia, li jinkludi l-ħolqien tar-rwoli ta’ Direttur Tekniku Federali u Koordinatur tal-proġetti tal-attivitajiet taż-żgħażagħ.
Fl-aħħarnett, ġew nominati membri ġodda għall-Kunsilli Direttivi tas-Settur Tekniku u tas-Settur taż-Żgħażagħ u l-Iskejjel. Fost in-nominati hemm Roberto Mancini, kif ukoll diversi eks players, coaches u uffiċjali tal-football Taljan.
