L-Għaqda Ġurnalisti Sports (GħĠS) kellha l-pjaċir li tattendi ċerimonja memorabbli mtella’ mill-Kumitat Organizzattiv tal-Oratorju Agostinjan f’Ħal Tarxien. L-attività ċċelebrat id-90 sena ta’ Fr Hilary Tagliaferro, personalità ferm rispettata fil-komunità Maltija għad-dedikazzjoni tul ħajtu għaż-żgħażagħ, l-isport, u d-direzzjoni spiritwali.

Iċ-ċerimonja li saret fil-Ġnien JoeAnn f’Ħal Tarxien, laħqet il-qofol tagħha bl-inawgurazzjoni ta’ bust kommemorattiv tal-istess Fr Hilary, maħdum mill-artist rinomat Malti Indri Attard. Familjari, ħbieb, u bosta individwi li darba kienu involuti fl-Oratorju Agostinjan attendew u saħqu dwar l-impatt dejjiemi ta’ Fr Hilary fil-komunità. Fost dawk li attendew kien hemm mistiednin distinti, fosthom iċ-Chairman ta’ SportMalta Matthew Pisani, il-President tal-Youth Football Association Norman Darmanin Demajo, il-President tal-Malta Football Association Bjorn Vassallo, u s-Sindku ta’ Ħal Tarxien Joseph Abela Galea.

F’isem l-GħĠS kien hemm il-President Clinton Buhagiar, is-Segretarju Ġenerali Lorraine Cunningham, Sandro Micallef, u Stephen Azzopardi, fejn b’ġest ta’ apprezzament mill-qalb, l-GħĠS ippreżentat lil Fr Hilary, l-ewwel President u wieħed mill-membri fundaturi tal-Għaqda, inkwadru b’sensiela ta’ ritratti ta’ diversi mumenti li ħallew impatt fil-ħajja tiegħu flimkien ma’ donazzjoni ta’ €100 b’risq il-Millenium Chapel f’Paceville. Din id-donazzjoni għandha tkompli tgħin il-proġett li waqqaf Fr Hilary sabiex tkompli tingħata gwida spiritwali u għajnuna lill-komunità.

L-GħĠS hija ferm onorata li kienet parti minn din il-ġurnata speċjali f’ġieh Fr Hilary Tagliaferro, li serviet bħala apprezzament għal-legat li huwa ħalla lis-soċjetà Maltija b’ħajja ddedikata għas-servizz, il-kompassjoni, u l-ispirazzjoni.