Hekk kif l-Iran kompla jiffaċċja iktar kritika lokali u internazzjonali dwar il-mewt ta’ mara li kienet fil-kustodja tal-pulizija, Tehran akkuża lill-Istati Uniti li qiegħda tuża r-rabja tal-poplu biex tiddistabbilizza lill-pajjiż.
L-Iran qiegħed jieħu azzjonijiet b’saħħithom fil-konfront ta’ dawk li qed jipparteċipaw fl-ikbar dimostrazzjonijiet mill-2019 ’il hawn, liema dimostrazzjonijiet żvolġew wara l-mewt ta’ Mahsa Amini – mara Kurda ta’ 22 sena li kienet ġiet arrestata minħabba li ma kinitx liebsa l-ħiġab. Dan il-każ qajjem kritika kemm lokali u anke internazzjonali.
Minkejja l-azzjonijiet b’saħħithom min-naħa tal-awtoritajiet Iranjani, dan xorta ma waqqafx lill-poplu milli jsejjaħ għat-tneħħija tal-Kap Suprem Ayatollah Ali Khamenei u l-bqija tal-mexxejja reliġjużi. Min-naħa tiegħu l-Prim Ministru Kanadiż Justin Trudeau qal li se jkunu qed jiġi imposti sanzjonijiet fuq dawk responsabbli għall-mewt ta’ Amini, fosthom dawk magħrufa bħala l-pulizija tal-moralità li wettqu l-arrest tagħha.
Fid-dawl tar-rabja internazzjonali lejn dan il-każ, l-Iran qiegħed jakkuża lill-Istati Uniti li qiegħda tappoġġja lid-dimostranti bil-għan li toħloq instabbiltà fir-Repubblika Iżlamika. Il-Ministru tal-Affarijiet Barranin Iranjan saħaq dan u tenna li l-isforzi Amerikani se jfallu.
