L-Ispeaker tal-Kamra tar-Rappreżentanti indirizza l-14-il Sessjoni Plenarja tal-Parlament Internazzjonali għat-Tolleranza u l-Paċi li sar fi Skopje, il-Maċedonja ta’ Fuq.
L-Ispeaker Farrugia sejjaħ għal azzjoni parlamentari b’saħħitha biex jiġu promossi l-paċi, it-tolleranza u r-responsabbiltà kemm fil-livell nazzjonali kif ukoll fuq livell internazzjonali.
Meta kien qed jitkellem dwar it-tema “Nimxu ’l Quddiem fit-Tolleranza u l-Paċi: Ir-Rwol Strateġiku tal-Parlamenti fit-Tfassil u l-Leġiżlazzjoni tal-Politiki għall-Futur”, l-Ispeaker Farrugia stqarr li l-parlamenti m’għandhomx jibqgħu osservaturi passivi tal-instabbiltà, iżda għandhom jeżerċitaw ir-responsabbiltà kostituzzjonali u morali tagħhom biex iżommu l-paċi b’mod permanenti fuq l-aġenda nazzjonali u internazzjonali.
L-Ispeaker enfasizza li l-parlamenti mhumiex sempliċement istituzzjonijiet leġiżlattivi, iżda “magni ta’ trasformazzjoni soċjali” fdati bil-ħarsien tal-paċi, l-ugwaljanza u d-dinjità tal-bniedem permezz tal-leġiżlazzjoni, l-iskrutinju u r-rappreżentanza.
Punt importanti waqt l-indirizz ta’ Dr Farrugia kien il-proposta tiegħu biex kull parlament irrappreżentat fi ħdan il-Parlament Internazzjonali għat-Tolleranza u l-Paċi jistabbilixxi “Kumitat Parlamentari għall-Paċi, it-Tolleranza u r-Responsabbiltà fil-Kunflitti”. Huwa ppropona li dawn il-kumitati jiffurmaw netwerk parlamentari globali taħt l-awspiċi tal-IPTP u jiltaqgħu regolarment kull xahar biex jiżguraw li l-paċi tibqa’ b’mod permanenti fuq l-aġenda parlamentari.
L-Ispeaker Farrugia saħaq li proposta bħal din tagħti lill-paċi “dar permanenti fil-parlament”, u tiżgura li l-paċi ma tiġix indirizzata biss wara li tkun seħħet traġedja, jew biss meta l-cameras u l-attenzjoni internazzjonali jkunu diġà ffukati fuq kriżi.
Huwa żied jgħid li jekk il-parlamenti jistgħu jistabbilixxu kumitati għall-finanzi, is-saħħa, l-edukazzjoni, id-difiża u l-affarijiet barranin, allura jistgħu wkoll jistabbilixxu kumitat għall-paċi, peress li l-valur ta’ kull politika oħra jiddgħajjef jekk il-paċi nnifisha tiġġarraf.
L-Ispeaker Anġlu Farrugia f’laqgħat bilaterali mal-Ispeaker tal-Maċedonja ta’ Fuq
Sadanittant, l-Ispeaker tal-Kamra tad-Deputati ta’ Malta, Dr Anġlu Farrugia, kellu laqgħa bilaterali uffiċjali mal-kontroparti tiegħu fil-Maċedonja ta’ Fuq, Afrim Gashi.
Matul il-laqgħa, iż-żewġ Speakers iddiskutew ir-relazzjonijiet bilaterali b’saħħithom u ta’ ħbiberija bejn Malta u l-Maċedonja ta’ Fuq, filwaqt li esploraw modi biex tissaħħaħ aktar il-kooperazzjoni bejn iż-żewġ pajjiżi, partikolarment permezz tad-diplomazija parlamentari u kollaborazzjoni istituzzjonali msaħħa.
Id-diskussjonijiet iffokaw ukoll fuq il-promozzjoni tat-tolleranza globali, id-djalogu u l-paċi, b’referenza partikolari għall-isfidi attwali li qed jiffaċċjaw l-Ewropa u l-Lvant Nofsani.
Iż-żewġ Speakers enfasizzaw l-irwol importanti tal-Parlamenti fit-trawwim tal-fehim reċiproku, il-promozzjoni tal-istabbiltà u l-inkoraġġiment ta’ kooperazzjoni internazzjonali kostruttiva fl-indirizzar tal-isfidi reġjonali u globali.
Dr Farrugia esprima l-apprezzament tiegħu lill-Ispeaker Gashi għall-ospitalità sħuna li wriet lid-delegazzjoni Maltija waqt iż-żjara tagħhom fil-Maċedonja ta’ Fuq u afferma mill-ġdid l-impenn ta’ Malta lejn inizjattivi mmirati lejn it-tisħiħ tal-paċi, it-tolleranza u d-djalogu interkulturali fil-livell internazzjonali.
L-Ispeaker Farrugia ltaqa’ wkoll mal-President tar-Repubblika tal-Maċedonja ta’ Fuq, Gordana Siljanovska-Davkova. Il-laqgħa enfasizzat aktar ir-relazzjonijiet eċċellenti bejn Malta u l-Maċedonja ta’ Fuq u pprovdiet opportunità biex jiġu skambjati fehmiet dwar l-importanza tad-djalogu, it-tolleranza u l-paċi fil-kuntest internazzjonali tal-lum.
L-Ispeaker kien akkumpanjat mill-Ambaxxatur Joseph Cole.
