L-Istati Uniti ħabbret fil-jiem li għaddew li se żżid il-preżenza militari tagħha madwar l-Ewropa hekk kif in-NATO qablet dwar bidla fundamentali fir-rispons tagħha għall-invażjoni tar-Russja fl-Ukrajna.
Dawn il-miżuri se jwasslu biex jinħoloq kwartieri ġenerali tal-armata permanenti fil-Polonja, filwaqt li bastimenti ġodda tal-gwerra tal-Istati Uniti se jintbagħtu Spanja, ajruplani tal-ġlied lejn ir-Renju Unit u truppi tal-art lejn ir-Rumanija. Il-President Amerikan, Joe Biden, qal li llum hemm ħtieġa għan-Nato aktar minn qatt qabel.
Skont il-Kap tan-NATO, Jens Stoltenberg, l-Alleanza tal-Atlantiku qed ikollha l-akbar reviżjoni mill-Gwerra Bierda ‘l hawn. Il-pjan il-ġdid b’reazzjoni għall-invażjoni tar-Russja se jfisser aktar minn 300,000 suldat fi tħejjija għolja s-sena d-dieħla, ogħla mil-livell attwali ta’ 40,000.
In-NATO se tkun imsaħħa fid-direzzjonijiet kollha f’kull qasam — art, arja u baħar.
Il-Ministeru tad-Difiża (MoD) tar-Renju Unit qal ukoll li qed iżid b’mod sinifikanti d-disponibbiltà tal-forzi għad-difiża kollettiva tan-NATO, b’aktar bastimenti tal-gwerra, ajruplani tal-ġlied u forzi tal-art fuq standby — għalkemm qal li mhux se jagħti dettalji dwar in-numri kif inhuma.
It-tħabbira tal-Istati Uniti se tkabbar il-preżenza tagħha madwar il-Kontinent Ewropew iżda partikolarment fl-Ewropa tal-Lvant fejn se jkun ibbażat il-kwartieri ġenerali permanenti l-ġdid tal-Armata.
Biden tenna l-impenn tal-Alleanza li tiddefendi kull pulzier tat-territorju Ewropew u qal li “Meta ngħidu attakk kontra wieħed huwa attakk kontra kulħadd”.
Ir-Renju Unit diġà kważi rdoppja d-daqs tal-preżenza militari tiegħu fl-Estonja, bi ftit aktar minn 1,600 suldat hemmhekk.
Aktar se jiġu allokati għad-difiża tal-Baltiċi, madankollu l-Ministeru tad-Difiża qal li dawn it-truppi addizzjonali jistgħu jinżammu għal-lest id-dar.
