Minflok ma tinħoloq strateġija ġdida, l-MDA temmen li Malta għandha tkompli tibni fuq il-viżjoni eżistenti tagħha tal-enerġija fit-tul billi żżomm investiment sostnut fil-ġenerazzjoni tal-elettriku, fin-netwerks tad-distribuzzjoni, fl-enerġija rinnovabbli, fil-ħażna tal-batteriji, fit-teknoloġiji tal-grids intelliġenti u f’infrastruttura kritiċi oħra.
L-MDA temmen li l-implimentazzjoni tal-viżjoni tal-enerġija fit-tul ta’ Malta għandha tkompli tevolvi permezz ta’ reviżjoni regolari, investiment u kollaborazzjoni bejn il-Gvern, l-Enemalta u s-settur privat, biex jiġi żgurat li l-infrastruttura żżomm il-pass mat-tkabbir ekonomiku tal-pajjiż u mad-domandi futuri tal-enerġija.
Il-prijoritajiet ewlenin skont l-MDA għandhom jinkludu:
* Tisħiħ u modernizzazzjoni kontinwi tan-netwerk nazzjonali tad-distribuzzjoni tal-elettriku.
* Żieda fl-investiment f’substations, transformers, infrastruttura tal-cable taħt l-art.
* Inċentivi aktar b’saħħithom biex jiġu aċċellerati l-installazzjonijiet fotovoltajċi.
* Żieda fl-investiment fit-teknoloġiji tal-grids.
* Koordinazzjoni aħjar bejn l-ippjanar tal-infrastruttura nazzjonali, l-investiment fl-utilitajiet u l-iżvilupp ġdid sabiex l-investiment fl-infrastruttura jimxi id f’id mat-tkabbir ta’ Malta.
* Inċentivi li jinkoraġġixxu l-kostruzzjoni ta’ bini aktar effiċjenti fl-enerġija filwaqt li jissalvagwardjaw l-affordabbiltà tad-djar.
* Appoġġ kontinwu għall-innovazzjoni fl-effiċjenza tal-enerġija, il-ħażna tal-enerġija u t-teknoloġiji emerġenti.
L-MDA temmen ukoll li l-implimentazzjoni ta’ din il-viżjoni fit-tul tibbenefika mit-twaqqif ta’ Kunsill Konsultattiv Nazzjonali għall-Infrastruttura u l-Enerġija biex jipprovdi pariri strateġiċi, jivvaluta d-domanda futura għall-elettriku, jidentifika l-prijoritajiet ta’ investiment fit-tul u jgħin biex jiżgura li Malta tibqa’ ppreparata sew għall-isfidi futuri.
