Se jkunu l-holders MFPA u ċ-champions tal-VMFA Cisk Premier League Gżira United li se jikkontestaw il-finali tal-VMFA Trophy wara li rebħu s-semifinali rispettiva tagħhom.
MFPA kisbu l-iktar rebħa tal-ġurnata meta għelbu lil Birkirkara St Helen’s 10-2.
Mark Barbara kien f’forma mill-aqwa meta skorja erba’ gowls filwaqt li Michael Galea kien awtur ta’ doppjetta. Alexander Ribic, Gareth Sciberras, George Frendo u Luke Cauchi komplew iżidu l-iskor għal Malta Football Players Association.
Mario Caruana u Ayrton Buhagiar skorjaw iż-żewġ gowls ta’ Birkirkara.
Mill-banda l-oħra, Gżira United rebħu logħba missielta kontra Floriana wara skor ta’ 5-3.
Il-Maroons bdew tajjeb u stabilixxew vantaġġ tajjeb għalkemm il-Greens dejjem baqgħu fil-logħba. L-iskorer prolifiku Ian Zammit spikka meta skorja tliet gowls filwaqt li Kurt Magro u Jonathan Pearson ukoll sabu x-xibka.
Floriana naqqsu l-marġni tal-iskor permezz ta’ doppjetta ta’ Manolito Micallef u gowl ieħor ta’ Christian Cassar.
Il-finali bejn MFPA u Gżira United se tintlagħab għada fit-8pm fil-grawnd tad-Dorotej f’Ħaż-Żebbuġ.
