L-Assoċjazzjoni tal-Lukandi u r-Ristoranti ta’ Malta (MHRA) laqgħet id-direzzjoni politika ċara favur infurzar aktar b’saħħtu kontra mġiba anti-soċjali. Hija temmen li t-tisħiħ tas-sistema tal-multi immedjati huwa pass pożittiv li jwassal il-messaġġ it-tajjeb.
Fi stqarrija, l-MHRA qalet li l-pass li jmiss issa għandu jkun riforma leġiżlattiva komprensiva. Qalet ukoll; “Malta issa teħtieġ liġijiet li jkunu ċari, prattiċi u li jistgħu jiġu infurzati, u li jagħtu lil kull awtorità tal-infurzar setgħat u responsabbiltajiet definiti sew. Dan jippermetti lill-Korp tal-Pulizija ta’ Malta, lill-Awtorità Maltija għat-Turiżmu (MTA) u lil awtoritajiet kompetenti oħra biex jaġixxu b’mod effettiv fl-oqsma rispettivi tagħhom, jagħmlu użu aħjar mir-riżorsi pubbliċi u jiksbu riżultati aħjar fil-qrati”.
L-MHRA tappoġġja bis-sħiħ lill-awtoritajiet kollha tal-infurzar. L-Assoċjazzjoni temmen li hemm tliet oqsma li jeħtieġu attenzjoni urġenti:
• Il-bejgħ tal-alkoħol tard bil-lejl irid ikun regolat kif suppost.
• Il-leġiżlazzjoni dwar l-istorbju trid tistabbilixxi standards ċari u infurzabbli.
• Il-leġiżlazzjoni attwali dwar il-kannabis għandha tiġi riveduta biex tiżgura li tilħaq l-objettivi maħsuba tagħha mingħajr ma tikkomprometti l-infurzar effettiv jew tibgħat il-messaġġ żbaljat li Malta hija permissiva lejn l-użu tad-droga.
L-MHRA żżomm pożizzjoni ta’ tolleranza żero dwar id-droga u l-kriminalità relatata mad-droga. Hija qalet li l-infurzar effettiv jeħtieġ ukoll kollaborazzjoni b’saħħitha bejn il-Gvern, l-awtoritajiet tal-infurzar, il-kunsilli lokali u s-settur privat.
Il-President tal-MHRA Tony Zahra jiddikjara li: “Malta għandha tibqa’ destinazzjoni vibranti fejn in-nies huma mistiedna jgawdu lilhom infushom. Iżda t-tgawdija tispiċċa fejn tibda l-liġi u r-rispett għall-komunità. Malta tilqa’ bil-qalb lil dawk li jirrispettaw pajjiżna. Dawk li jabbużaw mill-ospitalità tagħna permezz tal-vjolenza, id-drogi, l-istorbju eċċessiv jew l-imġieba antisoċjali għandhom jiffaċċjaw tolleranza żero”.
Zahra qal ukoll; “Id-direzzjoni hija t-tajba. Il-prijorità issa hija li nappoġġjaw infurzar aktar b’saħħtu b’leġiżlazzjoni aktar b’saħħitha li tipprovdi setgħat legali ċari, responsabbiltajiet ċari u għodod effettivi għall-awtoritajiet kompetenti kollha. Huwa biss dakinhar li nistgħu verament nissalvagwardjaw il-komunitajiet tagħna, nipproteġu lill-viżitaturi tagħna u nkomplu ngħollu l-kwalità tal-prodott turistiku ta’ Malta.”
L-MHRA ttenni l-impenn tagħha li taħdem b’mod kostruttiv mal-Gvern, l-awtoritajiet tal-infurzar u s-settur privat biex tappoġġja r-riforma leġiżlattiva u l-politiki ta’ ġestjoni tad-destinazzjonijiet li jsaħħu r-reputazzjoni ta’ Malta bħala destinazzjoni turistika sikura, ordnata u ta’ kwalità għolja.