Team Europe fetaħ il-Laver Cup b’vantaġġ ta’ 3-1 fuq Team World fl-ewwel ġurnata tal-kompetizzjoni f’The O2. Carlos Alcaraz u Jakub Mensik għalqu l-ġurnata b’rebħa ta’ 6-4, 6-4 fuq Alexander Bublik u Taylor Fritz fid-doubles. Għal Alcaraz, din kienet biss it-tieni kompetizzjoni tiegħu minn wara l-US Open, wara waqfa ta’ erba’ xhur minħabba injury.
Team Europe beda l-ġurnata b’rebħa għal Casper Ruud, li għeleb lil Francisco Cerundolo 6-7(4), 6-4, 10-8. Cerundolo rebaħ l-ewwel set permezz tat-tiebreak, iżda Ruud irkupra fit-tieni set u mbagħad żamm in-nervi fil-match tiebreak biex kiseb ir-rebħa.
Rafael Jodar ta punt ieħor lit-team Ewropew fid-debutt tiegħu fil-Laver Cup, meta għeleb lil Bublik 6-2, 6-3. Il-prestazzjoni tiegħu kienet segwita minn Roger Federer u John McEnroe mill-istands. Jodar qal li kien ta’ pjaċir għalih li żewġ eks champions kbar kienu qed isegwu l-ewwel dehra tiegħu fil-kompetizzjoni.
Team World kiseb l-uniku punt tiegħu permezz ta’ Brandon Nakashima, li għeleb lil Mensik 6-1, 3-6, 10-7. Wara li beda b’saħħa u rebaħ l-ewwel set faċilment, Nakashima tilef it-tieni set, iżda baqa’ kalm fil-match tiebreak u rebaħ il-logħba. Il-captain Andre Agassi faħħar il-kalma u l-konsistenza tiegħu.
Il-Laver Cup tlaqqa’ sitt players minn Team Europe kontra sitt players minn Team World fuq tlett ijiem. Il-punti jiżdiedu kuljum: rebħa nhar il-Ġimgħa tiswa punt, nhar is-Sibt żewġ punti u nhar il-Ħadd tliet punti.
L-ewwel team li jilħaq 13-il punt jirbaħ it-titlu. Team Europe għalhekk beda b’vantaġġ ta’ żewġ punti, iżda l-kompetizzjoni għadha miftuħa.
