Lewis Hamilton żar il-fruntiera ta’ Rafah bejn l-Eġittu u Gaża, fejn ingħata tagħrif dwar l-isforzi umanitarji biex tintbagħat għajnuna lill-popolazzjoni Palestinjana.
Is-sewwieq tal-Ferrari żar ukoll l-imħażen tal-Egyptian Red Crescent f’El-Arish, fejn jiġu ppreparati l-provvisti umanitarji qabel jintbagħtu lejn Gaża. Matul iż-żjara, li saret taħt il-gwida tal-Gvernatur tas-Sinaj tat-Tramuntana, Khaled Megawer, Hamilton iltaqa’ ma’ ħaddiema involuti fl-operazzjonijiet ta’ għajnuna.
Is-seba’ darbiet champion tad-dinja ilu jesprimi t-tħassib tiegħu dwar il-kriżi umanitarja u appella għall-paċi u għall-protezzjoni tat-tfal milquta mill-kunflitti.
Hamilton, li diġà ħa sehem f’inizjattivi umanitarji fil-Ġordan flimkien mal-British Red Cross, għamel din iż-żjara ftit jiem wara li laħaq l-400 bidu tiegħu fil-Formula 1 waqt il-Grand Prix tal-Brażil.
