Chelsea ……….0
Liverpool ………1
Bi 11-il player regolari mweġġgħin, Liverpool utilizzaw bosta players tal- Akkademja biex fil-finali tal-League Cup għelbu lil Chelsea, li kellhom skwadra sħiħa bl-eċċezzjoni ta’ Thiago Silva, bl-iskor ta’ 1-0 liema goal wasal żewġ minuti mit-tmiem tal-ħin barranin.
Din kienet l-10 darba li Liverpool rebħu din il-kompetizzjoni li huwa rekord assolut.
Kemm ilu jeżisti l-football Ingliż, qatt ma team f’finali kellu jirrikorri għal players żgħażagħ biex jirbaħ unur … li r-Reds jistgħu jiftaħru li utilizzaw sitta minnhom.
Għal Chelsea, din kienet umiljazzjoni kbira li matul dawn l-aħħar żewġ swieq tat-trasferiment laħqu l-£1 biljun fuq players ġodda.
Intant, fil-25 minuta, Liverpool tilfu lil Ryan Gravenberch meta Moises Caicedo kkommetta dak li deher foul professjonali fuqu. Kulħadd antiċipa li se jintwera l-karta l-ħamra iżda lanqas il-karta s-safra ma ntwera hekk kif il-VAR iġġudika li Caicedo ‘żelaq’ … filwaqt li Gravenberch inħareġ fuq stretcher.
Fl-34 minuta, Chelsea ħasbu li fetħu l-iskor minn Raheem Sterling iżda fil-proċess Nicolas Jackson kien f’pożizzjoni ta’ offside.
Fl-40 minuta, Liverpool kienu sfortunati meta daqqa ta’ ras ta’ Cody Gakpo ħabtet ma’ sieq il-lasta.
Fis-60 minuta, Virgil van Dijk skorja għal Liverpool iżda l-goal ġie mħassar b’mod kontroversjali meta l-VAR iġġudika li Wataru Endo kien f’pożizzjoni ‘ineżistenti’.
Ftit wara, Conor Gallagher laqat il-lasta għal Chelsea u proprju fl-aħħar minuti il-Pensioners setgħu rebħu meta kellhom tliet tentattivi salvati minn fuq il-linja fatali.
Fil-ħin barrani, kulħadd ħaseb li Liverpool kienu se jikkrollaw iżda l-players żgħażagħ qamu għall-okkażjoni u meritatament ħarġu rebbieħa.
Il-goal wasal żewġ minuti mit-tmiem meta Virgil van Dijk xeħet fir-rokna tax-xibka bir-ras mill-corner ta’ Kostas Tsimikas.
