“Ma jistax ikun li persuna bħal Liu tqatta’ sentejn minn ħajjitha f’inċertezza legali, sempliċement għax min kellu jiddeċiedi dwar jekk hi għandhiex jedd tibqa’ tirrisjedi f’Malta jew le, ma tahiex iċ-ċans li tagħmel is-sottomissjonijiet tagħha qabel ta d-deċiżjoni tiegħu.”. Dan iddikjaratu il-Qorti tal-Appell, f’deċiżjoni li tat fil-konfront ta’ Linwei Liu, Ċiniża li spiċċat bil-Permess ta’ Residenza tagħha ġie revokat. Wara hi kienet appellat iżda la hi u lanqas l-avukat difensur tagħha ma rċevew xi komunikazzjoni jew korrispondenza sabiex jidhru quddiem il-Bord u kull ma rċeviet kienet biss ittra biex tiġbor id-deċiżjoni.
Linwei Liu appellat minn deċiżjoni tal-Bord tal-Appelli dwar l-Immigrazzjoni, tat-3 ta’ Diċembru, 2021 li permezz tagħha l-Bord ċaħad l-appell tagħha abbażi tal-fatt li hija ma ressqet l-ebda sottomissjonijiet quddiem il-Bord, u kkonferma d-deċiżjoni ta’ Aġenzija Identity Malta.
“kienet taħdem bħala massage therapist fuq bażi full-time, ġewwa stabbiliment bl-isem ‘Sun Shine Chinese Massage’, iżda fi Frar tas-sena 2020 l-impjieg tagħha ġie tterminat”
Il-Qorti tal-Appell
Il-Qorti qalet li “Linwei Liu kienet waslet Malta fl-10 ta’ Settembru tas-sena 2019, u setgħet tgħix u taħdem f’Malta legalment bis-saħħa tas-Single Permit li nħarġilha fis-17 ta’ Ottubru tas-sena 2019. Hi kienet taħdem bħala massage therapist fuq bażi full-time, ġewwa stabbiliment bl-isem ‘Sun Shine Chinese Massage’, iżda fi Frar tas-sena 2020 l-impjieg tagħha ġie tterminat. Hi fittxet impjieg alternattiv permezz ta’ aġenzija tar-reklutaġġ, Home Care Services Malta, sabiex issib impjieg ieħor, u f’Marzu tas-sena 2020, hija sabet opportunità ta’ impjieg ġewwa lukanda. Spjegat li hija ma setgħetx tmur l-uffiċċji tal-Aġenzija Identity Malta minħabba fir-restrizzjonijiet li ġew introdotti waqt il-pandemija, u għalhekk ma setgħetx timla ċ-Change in Employer Form, bil-konsegwenza li għalhekk hija ma setgħetx tibda taħdem il-Waterfront Hotel. Enfasizzat li konsegwenza ta’ dan, il-Permess ta’ Residenza tagħha ġie revokat, u dan ladarba l-impjieg tagħha ġie tterminat, minkejja li hija ppruvat tirregolarizza l-affarijiet tagħha diversi drabi. Qalet ukoll li hija ressqet appell minn din id-deċiżjoni ta’ Identity Malta li tirrevokalha l-Permess ta’ Residenza, iżda l-avukat difensur tagħha li kellha dakinhar naqas milli jispeċifika l-aggravji tagħha fl-appell ippreżentat quddiem il-Bord.”
Daħlet f’relazzjoni ma’ ċittadin Malti li qed imantniha
Liu qalet li kemm ilha tgħix hawn Malta, hija daħlet f’relazzjoni ma’ ċittadin Malti, li qiegħed jieħu ħsieb imantniha, u huma għandhom il-ħsieb li jidħlu f’unjoni ċivili.
Il-Qorti qalet li “wara d-deċiżjoni u d-direzzjoni li tat din il-Qorti bis-sentenza tagħha tad-19 ta’ Mejju tas-sena 2021, id-Direttur tad-Dipartiment għaċ-Ċittadinanza u l-Espatrijati, L-Aġenzija Identity Malta infurmat lill-Bord li ladarba l-kundizzjonijiet li abbażi tagħhom kien inħareġ is-single permit ta’ Liu ma kinux għadhom fis-seħħ, il-permess ta’ residenza tar-rikorrenti ġie revokat.
Permezz tad-deċiżjoni mogħtija fit-3 ta’ Diċembru tas-sena 2021, il-Bord iddeċieda li l-appell ta’ Liu għandu jiġi miċħud. Wara dan, Liu ressqet l-appell tagħha minn din id-deċiżjoni fl-10 ta’ Diċembru fejn talbet lil din il-Qorti tħassar u tirrevoka d-deċiżjoni tal-Bord tat-3 ta’ Diċembru u tilqa’ t-talba tagħha sabiex tkun tista’ tibqa’ tirrisjedi ġewwa Malta. Liu spjegat li hija ħassitha aggravata bid-deċiżjoni appellata għax fil-fehma tagħha, il-Bord tal-Appelli dwar l-Immigrazzjoni għal darba oħra naqas milli jirrispetta d-dritt tagħha għal smigħ xieraq. Tenniet li f’dan il-każ la hi u lanqas l-avukat difensur tagħha ma rċevew xi komunikazzjoni jew korrispondenza sabiex jidhru quddiem il-Bord u jippreżentaw il-provi tagħhom, jew jagħmlu sottomissjonijiet fir-rigward tal-appell tagħha.
Liu qalet li minkejja s-sentenza ta’ din il-Qorti tad-19 ta’ Mejju li permezz tagħha l-Bord ingħata direzzjoni ċara sabiex jisma’ dak li għandha xi tgħid hi, l-unika komunikazzjoni li rċeviet kien mingħand il-Bord kienet ittra li infurmatha li hija għandha tiġbor kopja tad-deċiżjoni tal-Bord li issa qiegħda tappella minnha. Argumentat li il-Bord għal darb’oħra kien ddeċieda l-appell tagħha mingħajr ma taha l-opportunità li tiddefendi l-każ tagħha.
Liu żiedet tgħid li l-Bord ma kienx veritier meta qal li wara s-sentenza ta’ din il-Qorti, ta digriet fejn akkorda lill-partijiet ġimgħatejn żmien sabiex jagħmlu s-sottomissjonijiet tagħhom. Iddikjarat li la hi u lanqas l-avukat difensur tagħha ma ġew notifikati b’xi komunikazzjoni jew korrispondenza sabiex jersqu quddiem il-Bord bil-provi jew b’xi sottomissjonijiet tagħhom.
Il-Qorti fis-sentenza tagħha tas-17 ta’ Mejju qalet li din il-Qorti tat direzzjoni lill-Bord jikkonsidra s-sottomissjonijiet li kellha x’tagħmel Liu, wara li l-Permess ta’ Residenza tagħha ġie revokat konsegwenza tat-telf tal-impjieg tagħha hekk kif bdiet il-pandemija. Minkejja li Liu dak iż-żmien kienet sabet impjieg alternattiv, meta ġiet biex tirreġistra l-bidla fl-impjieg tagħha fl-uffiċċji ta’ Identity Malta, din sabet li dawn kienu magħluqa minħabba r-restrizzjonijiet li ddaħħlu fis-seħħ minħabba l-pandemija, u għalhekk ma setgħetx tirregolarizza ruħha ma’ Identity Malta. Jirriżulta wkoll li minkejja li l-appellanta inkarigat avukat sabiex jirrappreżenta l-interessi tagħha quddiemi il-Bord, dan naqas milli jippreżenta l-fatti u ċ-ċirkostanzi kollha tal-każ ta’ Liu. Minħabba f’hekk il-Bord fid-deċiżjoni tiegħu kkonkluda li Liu baqgħet ma tatx ir-raġunijiet għalfejn l-appell tagħha kellu jintlaqa’, u għalhekk ċaħad l-appell tagħha.
“l-Bord għandu jkun aktar sensittiv għas-sitwazzjonijiet tan-nies li jersqu quddiemu”
Il-Qorti tal-Appell
Fis-sentenza tagħha l-Qorti qalet li “l-Bord għandu jkun aktar sensittiv għas-sitwazzjonijiet tan-nies li jersqu quddiemu. F’dan il-każ il-Bord kellu direzzjoni ċara, jiġifieri dik li qabel jagħti d-deċiżjoni tiegħu, kellu jikkonsidra s-sottomissjonijiet tal-partijiet. Għal din il-Qorti mhux aċċettabbli, li minkejja d-deċiżjoni mogħtija minnha ftit anqas minn sena ilu, Liu għadha f’limbu legali dwar jekk hija tistax tibqa’ tirrisjedi ġewwa Malta jew le. L-inqas ħaġa li kellu jagħmel il-Bord qabel jgħaddi għad-deċiżjoni tiegħu, kienet li jassigura li d-digriet tiegħu tat-13 ta’ Settembru, 2021, wasal għand Liu u għand l-avukat difensur tagħha. Il-Bord ma jistax iġib l-iskuża li sar tentattiv ta’ notifika lill-avukat difensur tagħha.’
Intqal li “l-Qorti tifhem li l-Bord għandu mijiet ta’ appelli li jrid jiddeċiedi dwarhom u tapprezza wkoll li x-xogħol tal-Bord mhux faċli. Għal din il-Qorti iżda, wara kull appell quddiem il-Bord hemm persuna, u kull persuna li tersaq quddiem il-Bord tagħmel dan minħabba li f’ħajjitha kien hemm ċirkostanzi, ħafna drabi xejn feliċi, li wassluha tfittex futur aħjar ’il bogħod sew minn pajjiżha u mill-familja tagħha. Ma jistax ikun li persuna bħal Liu tqatta’ sentejn minn ħajjitha f’din l-inċertezza legali, sempliċement għax min kellu jiddeċiedi dwar jekk hija għandhiex jedd tibqa’ tirrisjedi f’Malta jew le, ma tahiex iċ-ċans li tagħmel is-sottomissjonijiet tagħha qabel ta d-deċiżjoni tiegħu. F’dan l-istadju l-Qorti sejra tqis l-avvenimenti li wasslu għal dan l-appell bħala sensiela ta’ nuqqasijiet amministrattivi, u għaldaqstant qiegħda tordna lill-Bord jieħu dawk id-deċiżjonijiet neċessarji sabiex Liu tingħata smigħ xieraq u titħalla tagħmel is-sottomissjonijiet li tixtieq tagħmel. Il-Qorti tagħmilha ċara għal darb’oħra li qabel jagħti d-deċiżjonijiet finali tiegħu, il-Bord għandu jassigura li l-partijiet involuti fi proċeduri quddiemu ġew notifikati b’kull ordni u b’kull digriet mogħtija minnu, u dan sabiex jiġu evitati appelli ta’ din ix-xorta.”
