Fil-logħba prinċipali tar-raba’ ġurnata tal-kampjonat tal-Ewwel Diviżjoni, Marsa St Michael u Għaxaq Wolves spiċċaw il-konfront ta’ bejniethom fi draw ta’ 2-2.
Il-logħba laħqet il-qofol tagħha fl-ewwel taqsima meta ġew skorjati l-erba’ gowls li kkaratterizzaw il-konfront.
Kien Lamin Jaiteh li poġġa lil Marsa St Michael minn fuq wara tmien minuti logħob sabiex Diego Fernando Pereira ġab l-iskor indaqs għal Għaxaq Wolves fil-21 minuta.
Jaiteh reġa’ skorja gowl ieħor għal Marsa għalkemm Zvezdan Vukovic skorja l-gowl tad-draw fil-ħin mogħti żejjed mir-referee qabel tmiem l-ewwel taqsima.
Minkejja l-attakki taż-żewġ timijiet fit-tieni taqsima, l-iskor baqa’ ma nbidilx biex ħadu punt kull wieħed.
Referee kien Karl Stefan Galea.
San Ġiljan Saints kisbu l-ewwel rebħa staġjonali wara li għelbu lill-ġirien Ta’ Ġiorni Wanderers 2-0.
Is-Saints kienu determinati li jiksbu l-punti massimi minn dan il-konfront u marru minn fuq fit-13-il minuta permezz ta’ Ionut Popescu sabiex minuta qabel tmiem l-ewwel taqsima, Jamie Bowlby Whiting rdoppja l-iskor għat-tim tiegħu.
Referee kien Jonathan Balzan.
Senglea Gunners telgħu fl-ewwel post tal-klassifika tal-kampjonat tat-tieni diviżjoni meta kisbu rebħa tajba ta’ 4-1 kontra Ħal Far Titans.
Protagonista għas-Sengleani kien Glenn Bonello li skorja tripletta fil-11, it-32 u t-58 minuta b’Nenad Stankic li żied ieħor għat-tim tiegħu.
Ħal Far, li għadhom qed ifittxu l-ewwel punti tagħhom f’dan il-kampjonat, naqqsu l-marġni tal-iskor minn David Rizzo.
Referee kien Thomas Debono.
Attard Edex Kings kisbu t-tieni rebħa konsekuttiva wara li għelbu lil Ħamrun Amateurs 2-0.
Wara taqsima fejn ma kellniex gowl, it-tim minn Ħ’Attard skorja żewġ gowls f’temp ta’ 12-il minuta li bihom għalaq il-logħba. U hawn spikka Ali Oularbi li skorja żewġ gowls u li bihom ta tliet punti importanti lit-tim tiegħu.
Referee kien Gordon Barbara.
Qajjeza ACJ kisbu l-ewwel rebħa tal-istaġun meta għelbu lil Mosta Vikings 3-1.
Kienet logħba ferm interessanti bil-qofol tagħha li ntlaħaq fl-ewwel taqsima.
Precious Tenebe poġġa lil Qajjenza minn fuq permezz ta’ penalty sabiex Ronnie Celeste irdoppja l-iskor. Darren Bartoli naqqas il-marġni tal-iskor minn penalty ieħor sabiex Celeste għaqqad doppjetta personali u jagħti r-rebħa lit-tim tiegħu.
Referee kien Ray Tabone.
KLASSIFIKA – MAFA L-EWWEL DIVIŻJONI
Għaxaq Wolves 10, Valletta St Paul’s 9, Marsa St Michael’s 7, Balluta Barracudas 6, San Ġwann Pro Evolution Academy, San Ġiljan Saints, Ta’ Ġiorni Wanderers 1, Mqabba Albions 0.
KLASSIFIKA – MAFA IT-TIENI DIVIŻJONI
Senglea Gunners 7, Attard Edex Kings 6, Birżebbuġa St Peter’s AFC 5, Valletta Stars St Dominic, Żebbuġ Youngsters, Ħamrun Amateurs, Gudja Wanderers, Ħal Far Titans 0.
KLASSIFIKA – MAFA IT-TIELET DIVIŻJONI
Swieqi United AFC 9, Qajjenza AFC 4, Naxxar Victorians 2, St Paul’s Bay NMFC, Mosta Vikings 0.