Ir-Rumanija sofrew telfa ta’ 4-2 kontra l-Bosnja u Herzegovina f’partita tal-UEFA Nations League li ntlagħbet bil-bibien magħluqa minħabba sanzjoni tal-UEFA għall-imġieba tal-partitarji.
Il-Bosnja ħadu l-kontroll tal-logħba u fetħu l-iskor permezz ta’ Armin Gigovic, li skorja b’daqqa ta’ ras wara cross ta’ Esmir Bajraktarevic. Tarik Muharemovic imbagħad irdoppja l-vantaġġ b’daqqa ta’ ras oħra minn corner ta’ Ivan Basic.
Ir-Rumanija wieġbu permezz ta’ Daniel Birligea, li naqqas id-distakk b’daqqa ta’ ras wara cross ta’ Lisav Eissat. Madankollu, qabel il-mistrieħ il-Bosnja reġgħu stabbilew vantaġġ ta’ żewġ goals meta Haris Tabakovic approfitta minn żball tal-goalkeeper Ionut Radu biex skorja t-tielet wieħed.
Ftit wara l-bidu tat-tieni taqsima, Ermin Mahmic għamilhom 4-1 b’daqqa ta’ ras oħra wara cross ta’ Bajraktarevic. Alexandru Cicaldau naqqas id-distakk b’xutt mill-bogħod, iżda r-Rumanija ma rnexxilhiex tirkupra.
B’dan ir-riżultat, huma baqgħu fl-aħħar post ta’ Grupp 4 tal-League B, filwaqt li l-Bosnja telgħet fil-quċċata.
