Il-leaders tal-kampjonat tat-tieni diviżjoni tal-MAFA Swieqi Braves ġew miżmuma fi dro ta’ mingħajr gowls minn Ta’ Ġiorni Wanderers.
Hekk kif intlagħbet is-sitt ġurnata minn dan il-kampjonat, spikkat ir-rebħa kbira ta’ 6-3 li Balluta Barracudas kellhom fuq Żabbar Southsiders filwaqt li Valletta Stars komplew jiġbru l-punti wara rebħa komda ta’ 3-0 kotnra Naxxar Victorians b’Gudja Wanderers jiksbu l-ewwel punt tal-istaġun wara dro ta’ 0-0 kontra Birkirkara St Joseph.
Swieqi Braves temmew is-sensiela ta’ rebħ konsekuttivi meta ġew miżmuma fi dro ta’ 0-0. Kienet logħba fejn l-istudenti Brażiljani ppruvaw jattakkaw sabiex isibu t-triq għall-gowl iżda sabu lid-difensuri tat-tim minn Ta’ Ġiorni kkonċentrati sal-aħħar sabiex b’hekk ċaħħduhom milli jiksbu l-ħames rebħa staġjonali.
Referee kien Peter Abela.
Balluta Barracudas telgħu fit-tieni post tal-klassifika wara rebħa kbira ta’ 6-3 kontra Żabbar. Il-Cudas kienu determinati li jirritornaw għar-rebħ wara l-aħħar draw li kisbu u minkejja li kienu gowl minn taħt, kienu kapaċi jdawwru l-iskor favurihom.
Kien Jean Paul Balzan li poġġa lil Żabbarin minn fuq fis-sitt minuta għalkemm Balluta skorjaw żewġ gowls permezz ta’ Jake Chetcuti fl-10 u fl-24 minuta.
James Cauchi reġa’ ġab l-iskor indaqs għaż-Żabbarin sabiex l-iskor sa tmiem l-ewwel taqsima ntemm 2-2.
Fit-tieni taqsima, Balluta ħarġu tajjeb u skorjaw tliet darbiet permezz ta’ Victor Fernandes, doppjetta ta’ Andrew Tortell u Nick Borg.
Is-Southsiders skorjaw gowl ieħor ta’ konsolazzjoni grazzi għal Jawneh Kawsu.
Referee kien Reno Galea.
Valletta Stars kisbu t-tielet rebħa staġjonali wara li għelbu lil Naxxar Victorians 3-0. Dawn tal-aħħar kienu qed isofru t-tielet telfa staġjonali.
Kien Mohamed Abdukadir li poġġa lill-Beltin minn fuq sabiex Viorel Valentin Lungu rdoppja l-iskor fit-49 minuta. Klajdi Qose issiġġilla r-rebħa għall-Istilel Beltin li issa jitilgħu fit-tielet post tal-klassifika b’disa’ punti.
Referee kien Georgi Bitri.
Birkirkara St Joseph fallew milli jitilgħu fit-tieni post tal-klassifika meta setgħu jiġu biss fi dro ta’ mingħajr gowls kontra Gudja Wanderers. Għal dawn tal-aħħar dan kien l-ewwel punt li kisbu matul dan l-istaġun. Huma ddefendew bi ħġarhom filwaqt li bdew itellgħu diversi kontrattakki.
Birkirkara ppruvaw jattakkaw iżda sabu lid-difiża Gudjana f’forma mill-aqwa.
Referee kien Lorry Sammut.
Mill-kampjonat tat-tielet diviżjoni, Ħamrun Amateurs kisbu l-ewwel rebħa tal-istaġun meta skorjaw żewġ gowls fit-tieni taqsima sabiex għelbu lil Fgura Spartans.
Wara taqsima fejn ma kellniex gowls, it-tieni taqsima kienet fatali għall-Fgurin bil-Ħamruniżi li skorjaw żewġ gowls permezz ta’ Josef Zammit u Marko Veselinov.
Referee kien Alex Grech.
