Bejn illum u għada tintlagħab it-tielet ġurnata tat-Tieni Fażi, jew aħjar id-19-il ġurnata tal-Malta Premier League, bl-akbar attrazzjoni tkun il-partita bejn Floriana u Hamrun Spartans li mistennija tiġbed l-akbar attendenza s’issa tal-istaġun.
Partita oħra mill-aktar interessanti hija dik bejn Hibernians u Marsaxlokk meqjusa bħala d-derby tan-naħa t’isfel ta’ Malta.
Birkirkara, li jinsabu fit-tieni post tal-klassifika, jiltaqgħu kontra Melita, li min-naħa tagħhom jimmiraw li jirrepetu li jwettqu sorpriża oħra wara li ġejjin minn rebħa sinjifikanti fuq Floriana.
Sliema Wanderers jaffrontaw lil Mosta, f’konfront mill-aktar bilanċjat u li r-riżultat jista’ jmur kull naħa.
Gzira United u Naxxar Lions hija partita bejn żewġ timijiet li jinsabu fl-aħħar żewġ postijiet tal- klassifika.
Min-naħa l-oħra, Balzan jilagħbu kontra Zabbar St Patrick liema partita tidher li se tkun inċerta sas-suffara finali minħabba li ż- żewġ timijiet bħal donnhom sabu l-forma.
Floriana v Hamrun S. – Dan il-konfront huwa wieħed mill-aktar mistenni bejn żewġ timijiet li wieħed diġá għandu postu fis-semi-finali għar-rebħ tat-titlu filwaqt li l-ieħor sab il-forma solita tiegħu wara bidu mill-aktar diżappuntanti, hekk kif qed jillijda l-klassifika ġenerali ta’ din it-Tieni Fażi.
Floriana ġejjin minn telfa xejn mistennija hekk kif kellhom ibaxxu rashom kontra Melita bl-iskor ta’ 2-0.
Min-naħa tal-Ispartans, dawn ġejjin minn żewġ rebħiet konsekuttivi biex huma l-uniku team li għamel dan minn daqstant logħbiet bil-konsegwenza li jinsabu fil-quċċata tal- klassifika.
Iż-żewġ timijiet se jinżlu bl-aqwa formazzjoni possibbli, bil-Furjaniżi jkunu msaħħa bir-ritorn tal-goalkeeper, Christoffer Henri Mafoumbi, minn sospensjoni.
Barra minn hekk, il-Greens mistennija jagħtu d-debutt liż-żewġ players Zach Scerri (Gzira U.) u Elvis Mashike (eks Hamrun Spatans).
Fiż-żewġ partiti preċedent, Hamrun rebħu waħda (2-1) u l-oħra spiċċat fi draw ta’ 1-1.
Hibernians v Marsaxlokk – Dawn iż-żewġ timijiet ġejjin minn riżultati kunstrastużi … hekk kif filwaqt li Hibernians sfaw megħluba minn Hamrun Spartans bl-iskor ta’ 2-1, Marsaxlokk dawru telfa f’rebħa biex għelbu lil Zabbar St Patrick, bl-iskor ta’ 3-1.
Ix-Xlukkajri jittamaw li Alex De Aguiar Gomes jkun fl-aqwa forma tiegħu biex ikompli jniżżel ismu fuq il-lista tal-iskorers wara li għamel dan għad-disa’ darba f’dan l-istaġun.
It-tweġiba tal-Pawlisti hija Jurgen Degabriele li skorja tnejn inqas minnu.
Huma jilqgħu bil-ferħa r-ritorn ta’ Kurt Shaw minn sospensjoni iżda Alex Bruno Da Souza Silva huwa sospiż.
Fl-Ewwel Fażi, iż-żewġ timijiet spiċċaw fi draw ta’ 1-1.
Birkirkara v Melita – Birkirkara jridu juru rispett massimu meta jiffaċċjaw lil Melita li min-naħa tagħhom jimmiraw li jirrepetu s-suċċess li rreġistraw fuq Floriana.
Il-Karkariżi ġejjin minn draw ta’ 2-2 kontra Gzira United bil-goal tal-Maroons jasal proprju fl-aħħar erba’ minuti.
Birkirkara ma jistgħux jagħmlu użu mis-sospiż, Leandro Lautaro Lacuna, filwaqt li għal Melita jirritorna l-captain, Jean Pierre Attard, minn sospensjoni.
Fil-konfront preċedenti, Birkirkara kienu għelbu lil Melita bl-iskor ta’ 3-0.
Mosta v Sliema W. – Din hija partita bejn żewġ timijiet li rreġistraw rebħa u sofrew telfa kull wieħed.
Barra minn hekk ma tkun l-ebda sorpriża li ż-żewġ timijiet jieħdu punt kull wieħed minkejja li fuq il-karta l-Wanderers huma xi ftit aħjar.
Peró, l-istess Wanderers se jkollhom jgħaddu mingħajr is-servizzi taż-żewġ players influwenti, Geoffrey Acheampong u Murilo Henrique Freire Bernardo, għax sospiżi.
Iżda jirritornaw Gustavo Alcino u Simon Zibo minn sospensjoni.
Il-Gżirjani għandhom lil Jake Vassallo sospiż.
Fl-Ewwel Fażi, is-Slimiżi rebħu ż-żewġ logħbiet, 2-0 u 3-1.
Gzira U. v Naxxar L. – Gzira United jaffrontaw lil Naxxar Lions li jinsabu fil-qiegħ tal-klassifika mingħajr l-ebda punt wara żewġ telfiet identiċi ta’ 4-0 kontra Floriana u Sliema Wanderers.
Min-naħa ta’ Gzira, dawn rebħu punt fid-draw ta’ 2-2 kontra Birkirkara.
Il-Lions iridu jagħrfu kif se jirriorganizzaw wara li fl-Ewwel Fażi spiċċaw ukoll fl-aħħar post.
Huma għandhom lil Neil Pace Cocks sospiż filwaqt li l-Maroons għandhom lil Enrico Pepe u Luis Carlos Riascos neqsin għall-istess raġuni.
Iż-żewġ partiti tal-Ewwel Fażi spiċċaw fi draws ta’ 1-1.
Zabbar SP v Balzan – Zabbar St Patrick jimmiraw li jagħmlu treble ta’ riżultati meta fit-tnejn preċedenti huma għelbu lil Balzan bl-iskors ta’ 2-0 u 2-1.
U filwaqt li huma jridu jirritornaw għar-rebħ wara t-telfa ta’ 3-1 kontra Marsaxlokk, Balzan se jkunu sfida mill-aktar diffiċli.
– Cristian Muscat