Minn Cristian Muscat
Bejn illum u għada tintlagħab l-14-il ġurnata tal-Closing Round hekk kif l-attenzjoni prinċipali tkun mixħuta fuq il-konfront bejn ir-rivali eterni Floriana u Valletta li mistennija tiġbed l-akbar folla tal-istaġun s’issa.
Il-Furjaniżi jinsabu f’ burdata ta’ briju hekk kif proprju għada jiċċelebraw il-festa tal-patrun tagħhom, San Publiju, filwaqt li huma għandhom bżonn punt wieħed biss biex jirbħu l-Closing Round u għaldaqstant jidher li se jkunu huma li se jikkontestaw il-partita deċiżiva għar-rebħ tal-Malta Premier League.
Huma se jagħmlu dan jekk Hamrun Spartans jispiċċaw fi-tieni post wara li kienu rebħu l-Opening Round.
Iżda, bħalissa l-konċentrazzjoni ta’ kull Furjaniż hija kif se jegħlbu lill-ġirien tagħhom, Valletta għal diversi raġunijiet.
Iż-żewġ partiti l-oħra mit-Top Six xorta waħda huma interessanti minħabba li jirrigwardjaw il-post għall-UEFA Conference League, hekk kif Marsaxlokk jiffaċċjaw lil Gzira United filwaqt li Hamrun Spartans jaffrontaw lil Naxxar Lions.
Fin-naħa t’isfel tal-klassifika, jintlagħab il-konfront dirett bejn Tarxien Rainbows u Zabbar St Patrick li jinsabu fil-post ta’ qabel l-aħħar u għaldaqstant jimmiraw li jtemmu barra ż-żona l-ħamra … speċjalment Tarxien Rainbows li fl-Opening Round temmew fl-aħħar post.
Floriana v Valletta – L-Istadium Nazzjonali għandu jospita festa ta’ football hekk kif Floriana u Valletta jkunu armati sa snienhom b’kull xorta ta’ briju biex finalment joħorġu rebbieħa mas-suffara finali tar-referee.
Filwaqt li l-Greens jimmiraw li jilħqu l-objettiv tagħhom li jirbħu l-Closing Round, il-Lilywhites jimmiraw li jħassrulhom ċ-ċelebrazzjonijiet u fuq kollox il-festa Furjaniża.
Wara kollox, dawn tal-aħħar għadhom iridu jegħlbu lill-Beltin f’dan l-istaġun, meta t-tliet partiti preċedenti temmew f’rebħa ta’ 2-0 għal Valletta u f’żewġ draws ta’ 0-0.
Iż-żewġ timijiet mistennija jkunu bl-aqwa formazzjoni possibbli bl-eċċezzjoni tal-player Belti, Thaylor Aldama, li jinsab sospiż.
Marsaxlokk v Gzira U. – Wara t-telfa kontra Floriana bl-iskor ta’ 3-1, Marsaxlokk iridu jirriorganizzaw hekk kif se jaffrontaw team li għandu moral għoli wara li ġej minn rebħa ta’ 1-0 kontra Hamrun Spartans.
Mindu Gzira United ikkwalifikaw għall-finali tal-FA Trophy, huma saru team trasformat għal kollox.
Min-naħa tagħhom, ix- Xlukkajri jridu jirbħu fit-tentattiv li jtemmu fit-tieni jew fit-tielet pożizzjoni.
Il-Maroons għandhom lil Andrew Borg u lil Luis Riascos sospiżi.
Hamrun S. v Naxxar L. – Hamrun Spartans jimmiraw li jwaqqfu s-sensiela ta’ tliet telfiet infila meta jiltaqgħu kontra Naxxar Lions li ġejjin minn draw ta’ 1-1 kontra Valletta.
Huma għandhom lil Vincenzo Polito sospiż.
Tarxien R. v Zabbar SP – Dan huwa konfront mill- aktar interessanti li jlaqqa’ liż-żewġ timijiet li jinsabu fil-post ta’ qabel l-aħħar.
Filwaqt li Tarxien Rainbows ġejjin minn rebħa ta’ 3-2 fuq Hibs, Zabbar St Patrick sfaw megħluba minn Mosta 2-1.
Rebħa għaż-Żabbarin tkun tfisser li r-Rainbows jersqu aktar lejn ir-relegazzjoni li għandhom lil Abdelrahman Alhagi sospiż.
Hibernians v Birkirkara – Din hija logħba bejn żewġ ġganti tal-football Malti, li iżda kellhom jikkuntentaw biex jilagħbu fil-Bottom Six u li l-istaġun għalihom huwa mitmum.
Hibernians jinżlu għal rebħa wara li ilhom ma jagħmlu dan għal dawn l-aħħar disa’ partiti.
Mosta v Sliema W. – Dan huma konfront bejn it-team li jinsab fil-quċċata tal-Bottom Six, Sliema Wanderers, u dak li jinsab fl-aħħar post, Mosta.
Dawn tal-aħħar se jkollhom jgħaddu mingħajr Zachary Brincat filwaqt li Gustavo Alcino se jkun nieqes għall-Wanderers, għax sospiżi.