Minn Cristian Muscat
Bejn illum u għada tintlagħab l-10 ġurnata tal-Closing Round jew aħjar is-26 waħda tal-istaġun.
Dan il-programm se jintlagħab matul il-ġimgħa minħabba l-preparazzjoni tat-team nazzjonali Malti għaż-żewġ logħbiet validi mill-kwalifikazzjoni tat-Tazza tad-Dinja 2026 kontra l-Finlandja f’darna u l-Polonja barra minn xtutna.
Dan il-programm mistenni jagħti indikazzjoni fejn it-timijiet jistgħu jispiċċa f’din id-dritta finali tal- kampjonat.
L-aktar konfront li jispikka huwa dak bejn il-leaders Floriana u Birkirkara, b’dawn tal-aħħar jimmiraw li jaqbżu lill-Greens fil-quċċata tal-klassifika.
Partita oħra mill-aktar interessanti hija dik bejn Hamrun Spartans u Sliema Wanderers li xejn għajr minn rebħa ma tissodisfa l-kriterji taż-żewġ timijiet.
Marsaxlokk jimmiraw li jirritornaw għar-rebħ meta jaffrontaw lit-team ta’ qiegħ il-klassifika Naxxar Lions.
Hibernians għandhom partita delikata meta jiltaqgħu kontra Balzan li jinsabu fil-bżonn tal-punti hekk kif qed jissieltu għas-salvazzjoni.
Żewġ partiti diretti għat-Top Six huma Mosta kontra Melita u Zabbar St Patrick kontra Gzira United.
Floriana v Birkirkara – Din hija l-aqwa partita ta’ dan il-programm fejn Floriana jaffrontaw lil Birkirkara li fl-aħħar ħarġa tagħhom spiċċaw fi draw ta’ 1-1 kontra Marsaxlokk biex il-Furjaniżi approfittaw u bir-rebħa ta’ 3-0 fuq Gzira United, huma qabżu waħedhom fil-quċċata tal- klassifika.
Dan huwa konfront bejn iż-żewġ timijiet li fl-Opening Round spiċċaw fl-ewwel żewġ postijiet biex aċċertaw ruħhom fis-semi-finali għar-rebħ tat-titlu.
Madankollu jekk Floriana jtemmu fl-ewwel post f’dan il-Closing Round, jiġu nkurunati champions.
Kull team għandu player sospiż – il-goalkeeper Yann-Alexandre Fillion għal Floriana u Shaun Dimech għal Birkirkara.
Min-naħa l-oħra, Floriana jilqgħu lura lil Oualid El Hasni minn sospensjoni.
Fiż-żewġ konfronti preċedenti Floriana dejjem ħarġu rebbieħa bl-iskor ta’ 3-1 u 1-0.
Hamrun S. v Sliema W. – Taħt it-tmexxija l-ġdida tal-coach, Winston Muscat, Hamrun Spartans jiffaċċjaw lil Sliema Wanderers hekk kif iż-żewġ timijiet ma jaffordjawx jitilfu l-punti … Hamrun biex iżommu t-tamiet tagħhom li jtemmu mal-ewwel tnejn filwaqt li Sliema qed jissieltu biex itemmu mal-ewwel sitta.
Il-pressjoni tinsab fuq l-Ispartans minħabba li ma jistgħux ifallu milli jispiċċaw fl-ewwel żewġ postijiet.
Wara bidu tant tajjeb, il-Wanderers bħal donnhom sfaxxaw, tant, li sofrew tliet telfiet konsekuttivi. Telfa għalihom tkun indikazzjoni li fit-tieni round jilagħbu fil-Bottom Six.
L-Ispartans ma jistgħux jinkludu lil Raphael Lopes Silva għax sospiż filwaqt li jirritorna Elionay Freitas Da Silva minn sospensjoni.
Min-naħa l-oħra, għall-Blues jirritorna Geoffrey Acheampong minn sospensjoni.
Fiż-żewġ logħbiet preċedenti, Sliema rebħu waħda 1-0 bl-oħra tintemm fi draw ta’ 1-1.
Naxxar L. v Marsaxlokk – Marsaxlokk jibdew favoriti li jieħdu t-tliet punti meta jiltaqgħu kontra t-team ta’ qiegħ il-klassifika, Naxxar Lions.
Rebħa hija fundamentali għax-Xlukkajri biex iżommu l-pass mal-leaders Floriana u saħansitra jistgħu jaqbżu waħedhom fl-ewwel post jekk il-Greens itemmu fi draw kontra Birkirkara.
Huma ma jistgħux jinkludu lil Nikolai Muscat u lil Jose Ulises Arias għax sospiżi filwaqt Naxxar se jkunu msaħħa bir-ritorn ta’ Yasukaze Ito minn sospensjoni.
Fiż-żewġ partiti diretti ż-żewġ timijiet spiċċaw fi draws ta’ 0-0 u 1-1.
Hibernians v Balzan– Jekk Hibernians iridu jżommu l-pass fit-tentattiv li jtemmu fl-ewwel żewġ postijiet ta’ din il-fażi, hija prioritá għalihom li joħorġu bit-tliet punti kontra Balzan li jinsabu fil-post ta’ qabel l-aħħar.
Peró, il-Pawlisti jridu juru rispett massimu lejn il- Balzanin li l-pożizzjoni tagħhom hija “gidba” minħabba li dejjem kienu sfida denja għal kull avversarju.
Hibernians se jkunu mingħajr is-sospiż Lucas Caruana iżda jirritornaw Pedro Henrique u Alfred Hamanjoda Silas minn sospensjoni filwaqt li Nicholas Pulis jirritorna għal Balzan.
Fil-partita preċedenti Hibernians ħarġu rebbieħa bl-iskor ta’ 1-0.
Mosta Melita – Din hija partita diretta bejn żewġ timijiet li qed jiġġieldu għal post mat-Top Six.
Iż-żewġ timijiet mistennija jinżlu bl-aqwa formazzjoni possibbli hekk kif għal Melita jirritorna Marc Van De Font Bovenkamp minn sospensjoni.
Fil-konfront preċedenti Mosta kienu għelbu lil Melita bl-iskor ta’ 2-1.
Zabbar SP v Gzira U.– Din hija partita miftuħa għal kull riżultat bejn żewġ timijiet li għandhom l-istess ammont ta’ punti u li jinsabu biċ-ċans li jikkwalifikaw mat-Top Six.
Gzira għandhom lil Thaylor Aldama u lil Gabriel Bohrer Mentz sospiżi filwaqt li Diogo Tavares u David Oliveira Souza jirritornaw għal Zabbar minn sospensjoni.
Fiż-żewġ partiti tal-Ewwel Fażi, il-Maroons dejjem ħarġu rebbieħa bl-iskors ta’ 3-1 u 2-1.
