Minn Cristian Muscat
Proprju llum jingħata bidu għat-Tieni Fażi tal- Closing Round jew aħjar it-28 ġurnata tal-Malta Premier League.
Bla dubju, din il-fażi se tkun mill-aktar interessanti minħabba li s-sitt timijiet fit-Top Six għandhom ċans kbir jispiċċaw fl-ewwel żewġ postijiet filwaqt li fil-Bottom Six, għajr Hibernians, ħames timijiet se jissieltu għas-salvazzjoni.
Kull żelqa fit-Top Six tista’ tkun detrimentali minħabba li l-partiti se jkunu “diretti u finali” hekk kif bejn l-erba’ timijiet li qed jillidjaw il-klassifika u dak li jinsab fl-aħħar post hemm differenza ta’ żewġ punti biss.
Fil-Bottom Six, id-differenza bejn l-aħħar ħames timijiet hija dik ta’ erba’ punti biss.
Peró, l-eku tal-inċidenti li seħħew fi tmiem il-ġimgħa li għadda fil-Gozo Stadium, bejn Zabbar St Patrick u Mosta, għadu jidwi hekk kif nhar l-Erbgħa ġew ippubblikati s-sospensjonijiet ta’ dawk involuti bl-aktar li jintlaqtu ħażin huma ż-Żabbarin.
Ħames players ġew sospiżi għal bosta logħbiet. L-istaġun għall-goalkeeper, Justin Haber, huwa prattikament mitmum hekk kif ingħata sospensjoni ta’ ħames logħbiet, Felix Wallace Bonilha u Kristian Keqi ġew sospiżi tliet partiti kull wieħed, Jovancic Strahinja tnejn u Vinicius De Paiva waħda.
Min-naħa ta’ Mosta, l- uniku player li ġie sospiż kien Emmanuel Prince Chibuzor li weħel żewġ partiti.
Birkirkara v Hamrun S. – Dan il-konfront huwa l-aqwa wieħed ta’ dan il-programm.
Rebħa għal Birkirkara tkun ifisser li jsaħħu l-ewwel pożizzjoni u jiftħu vantaġġ ta’ ħames punti fuq Hamrun Spartans.
Iżda jekk dawn tal-aħħar joħorġu rebbieħa jaqbżu lill-istess Karkariżi b’punt li se jkunu msaħħa bir-ritorn tal-goalkeeper, Giacomo Volpe, u Manuel Ignacio Morello, minn sospensjoni filwaqt li l-Ispartans jilqgħu bil-ferħa lil Joseph Mbong.
Fit-tliet partiti preċedenti, kull team rebaħ waħda – Birkirkara 3-2, Hamrun 2-0, bl-oħra tispiċċa fi draw ta’ mingħajr goals.
Floriana v Sliema W. – Il-partita bejn dawn iż-żewġ rivali l-aktar antiki fl-istorja tal-football Malti hija vitali kemm għal Floriana kif ukoll għal Sliema Wanderers.
Il-Furjaniżi jridu jkunu fl-aqwa tagħhom hekk kif se jiffaċċjaw team b’moral mill-aktar għoli hekk kif ġejjin minn tliet rebħiet konsekuttivi biex finalment issiġillaw il-profil tagħhom mal-ewwel sitt timijiet.
Dawn kienu kontra Balzan (3-2), Hamrun Spartans (1-0) u Birkirkara (2-1).
Min-naħa tagħhom, il-Furjaniżi ġejjin minn rebħa (Gzira U. 3-0), telfa (Birkirkara 2-0) u draw (Hibernians 1-1).
Floriana għandhom lil Guy Serge Cedric Yameogo sospiż iżda José Fernando Junior jirritorna minn sospensjoni.
Fit-tliet logħbiet diretti, Floriana rebħu tnejn, 1-0 u 2-1 filwaqt li l-oħra spiċċat fi draw ta’ mingħajr goals.
Mosta v Marsaxlokk – Marsaxlokk jibdew favoriti kontra team li huwa meqjus bħala enigma u imprevidibbli.
B’mod sorprendenti, iż-żewġ timijiet qed jaqsmu l-ewwel post ma’ Birkirkara u Floriana u għaldaqstant rebħa tagħtihom tliet punti mill-aktar importanti biex jibqgħu jisfidaw għall-ewwel żewġ postijiet.
Ix-Xlukkajri jittamaw li ż-żewġ players, Alex De Aguiar Gomes u Yuri De Jesus Messias, ikunu fl-aqwa forma tagħhom hekk kif bejniethom s’issa skorjaw 25 goal.
Min-naħa ta’ Mosta, bla dubju, se jħossu n-nuqqas tas-sospiż Emmanuel Prince Chibuzor.
Ix-Xlukkajri jridu jpattu għaż-żewġ telfiet diretti bl-iskors ta’ 4-2 u 2-1.
Hibernians v Melita– Hibernians, id-diżappunt ta’ dan l-istaġun, jiffaċċjaw lil Melita.
Meqjusa bħala wieħed mill-ġganti tal-football domestiku, l-isfida tal-kampjonat għall-Pawlisti hija mitmuma. Id-draw ta’ 1-1 kontra Floriana kkundannahom mal-aħħar sitta.
Għal Melita, xejn għajr minn rebħa ma tissodisfa l-kriterji tagħhom jekk iridu jinqalgħu mill-aħħar post li qed jaqsmu ma’ Balzan u Naxxar Lions.
Huma se jkunu mingħajr is-sospiż Gareth Barone iżda jirritorna Aldair Simanca Pena minn sospensjoni.
Gzira U. v Balzan– Dan il-konfront għandu jkun mill-aktar interessanti bejn żewġ timijiet li d-differenza bejniethom hija dik ta’ tliet punti.
Jekk il-Maroons joħorġu rebbieħa, huma jagħmlu pass kbir għax jiftħu vantaġġ ta’ ħames punti mill-aħħar post. Iżda jekk Balzan jirnexxielhom jiksbu t-tliet punti jaqbżu lill-istess Gzira.
L-uniku player sospiż huwa dak ta’ Balzan, Samir Arab.
Fit-tliet partiti preċedenti kull team rebaħ bl-iskor ta’ 2-1, bil-logħba l-oħra tintemm fi draw.
Zabbar SP v Naxxar L.– Naxxar Lions jimmiraw li jirkupraw mit-telfa kbira ta’ 5-0 kontra Hamrun Spartans u għandhom japprofittaw mil-lista ta’ players sospiżi għal Zabbar imsemmijin fl-introduzzjoni.
In-Naxxarin ikunu msaħħin bir-ritorn tal-goalkeeper, Matthias Debono, minn sospensjoni.
Tnejn mill-logħbiet preċedenti spiċċaw fi draws 3-3 u 1-1, biż-Żabbarin jirbħu l-oħra bl-iskor ta’ 3-0.
