Kellha tkun rebħa drammatika ta’ 1-0 dik miksuba minn Man Utd ġewwa darhom kontra Omonia Nicosia biex kisbu tliet punti prezzjuzi. F’partiti oħra, Arsenal kisbu rebħa minima ta’ 1-0 kontra Bodo Glimt, waqt li Roma u Lazio kisbu riżutati ta’ draw.
UEFA EUROPA LEAGUE
Bodo Glimt v Arsenal
Arsenal barra minn darhom għelbu lil Bodo Glimt bl-iskor minimu ta’ 1-0, bil-goal uniku għalihom jasal minn Bukayo Saka (24).
Betis v Roma
Roma sfaw miżmuma minn Betis fi draw ta’ 1-1, bil-goal għall-Giallorossi jasal minn Andrea Belotti (53), waqt li kien Sergio Canales (34) li fetaħ l-iskor għal Betis.
St Gilloise v Braga
St Gilloise – it-team li miegħu jilgħab il-player internazzjonali Malti Teddy Teuma temm il-konfront kontra l-Portugiżi ta’ Braga fi draw ta’ 3-3. Il-protagonisti għall-Belġjani hekk kif irnexxielhom isibu x-xibka kienu Victor Boniface li rreġistra doppjetta personali (20, 62) u Dante Vanzeir (49). Min-naħa l-oħra, it-tliet goals għal Braga waslu minn hat-trick personali ta’ Vitinha (15, 36, 41).
Man Utd v Omonia N.
Man Utd ġewwa darhom f’Old Trafford kisbu rebħa drammatika ta’ 1-0 kontra ċ-Ċiprijotti ta’ Omonia Nicosia, bil-goal tant importanti għalihom jasal miż-żagħżugħ Skoċċiż Scott McTominay (92). Ir-Red Devils kienu l-aħjar team tul id-90 minuta, iżda sabu lill-goalkeeper ta’ Omonia, Francis Uzoho, f’vena mill-aqwa, fejn salva diversi goals ċerti.
Lazio v Sturm Graz
Lazio ġewwa darhom fi Stadio Olimpico sfaw miżmuma mill-Awstrijaċi ta’ Sturm Graz fi draw diżappuntanti ta’ 2-2. Kien is-solitu Ciro Immobile li fetaħ l-iskor għall-Biancoceleste permezz ta’ penalty (45), waqt li s-sostitut William Boving li kien ilu biss 10 minuti fil-ground, ġab l-iskor indaqs għal Sturm Graz fis-56 minuta.
Pedro reġa’ tefa’ lil Lazio fil-vantaġġ fil-71 minuta, iżda William Boving kiseb id-draw għall-Awstrijaċi fit-83 minuta, biex irreġistra doppjetta personali. Detrimentali għal Lazio kien il-fatt li huma spiċċaw jilagħbu b’10 players fis-47 minuta meta tkeċċa għalihom il-player Manuel Lazzari wara li rċieva żewġ karti sofor fil-partita.
UEFA EUROPA CONFERENCE LEAGUE
Fiorentina ġewwa darhom fi Stadio Artemio Franchi umiljaw lil Hearts meta għelbuhom bl-iskor kbir ta’ 5-1. Il-goals għall-Viola waslu minn Luka Jovic (6), Cristiano Biraghi (22), Nicolas Gonzalez li rreġistra doppjetta personali (32, 79), bit-tieni goal għalih jasal minn penalty u Antonin Barak (38). Min-naħa l-oħra, l-uniku goal fil-partita għall-Iskoċċiżi wasal minn Stephen Humphrys (47).
West Ham v Anderlecht
West Ham ġewwa darhom għelbu lil Anderlecht bl-iskor ta’ 2-1, biż-żewġ goals għalihom jaslu minn Said Benrahma (14) u Jarrod Bowen (30). Sebastiano Esposito minn penalty (90) naqqas il-marġni tal-iskor għal Anderlecht.
