Illum jimmarka l-10 anniversarju mill-goal drammatiku ta’ Sergio Aguero li bih għen lil Manchester City jirbħu l-ewwel kampjonat Ingliż mill-1968.
Biex ifakkru dan il-goal, il-club kixef mafkar ħdejn l-Etihad Stadium ad unur l-attakkant Arġentin, Sergio Aguero, li kien proprju hu li skorja l-goal rebbieħ fit-93 minuta.
Dakinhar Manchester City kienu rebħu bl-iskor ta’ 3-2 fuq Queens Park Rangers biex temmew it-tamiet ta’ Manchester United li jirbħu l-istess titlu. Sa qabel il-goal ta’ Aguero kollox kien jindika li t-titlu kien se jintrebaħ minn Manchester United li għelbu lil Sunderland bl-iskor ta’ 1-0.
Fil-karriera tiegħu mas-Citizens, Aguero skorja xejn inqas minn 260 goal u għaldaqstant l-istatus ta’ leġġendarju issa se jkun immortalizzat barra l-istadium.
L-iskultura turi ċ-ċelebrazzjoni ta’ Aguero jxejjer il-flokk meta skorja l-goal rebbieħ kontra QPR.
