Bħal lum 3 ta’ April tas-sena 1948, bdiet rewwixta xelllugija fil-gżira Koreana ta’ Jeju. Din il-gżira, wara it-Tieni Gwerra Dinjija, kienet immexxija minn self government u dan wara li l-Korea kienet maqsuma f’dik ta’ fuq u dik ta’ isfel wara it-telfa tal-Ġappun.
Fil-gżira ta’ Jeju, in-nies kienen imdejqin u rrabbjati għall-Pulizija vjolenti appoġġjati mill-Istati Uniti.
In-nies bdew jibżgħu li l-elezzjonijiet li kien hemm ippjanati u li kienu organizzati minn Nazzjonijiet Uniti fil-Korea ta’ Isfel kienu se jkomplu jinfurżaw id-diviżjoni bejn il-Korea ta’ Fuq u ta’ Isfel. In-nies ħarġu jipprotestaw u attakkaw l-għases tal-Pulizija. Il-militar tal-Istati Uniti bagħat għadd ta’ truppi fil-gżira u l-awtoritajiet tal-Korea ta’ Isfel appoġġjati mis-suldati Amerikani għamlu ħerba sħiħa mill-protestanti. Ġew massakrati eluf ta’ nies fosthom nisa u tfal. F’dawn l-irvellijiet u l-attakki tas-suldati, inqatlet 10 fil-mija tal-popolazzjoni ta’ Jeju. Apparti dan 70 fil-mija tal-villaġġi inqerdu. Wara id-dittatura li kien hemm fil-Korea ta’ Isfel żammet milli jissemmew jew jitfakkru dawn il-protesti. Kull min kien isemmi dawn kien jispiċċa imsawwat, ittorturat u b’sentenza twila ta’ ħabs.
