Aktar minn 14,000 ħaddiem tas-salvataġġ waslu f’Tibet biex jassistu fit-tfittxijiet għal aktar persuni li huma maħsuba li rnexxielhom isalvaw mit-terremot li ħalla minn tal-inqas 126 persuna mejta f’parti remota tal-punent taċ-Ċina.
Il-midja tal-istat Ċiniża qiegħda tirrapporta li minn meta seħħ it-terremot it-Tlieta li għadda sa issa ġew salvati aktar minn 400 persuna.
Il-Viċi Prim Ministru Zhang Guoqing wasal l-Erbgħa biex jissorvelja l-operazzjoni li qed tkun imxekkla minn temperaturi kisħin li niżlu saħansitra taħt is-16-il grad Celcius matul il-lejl.
It-terremoti f’dan ir-reġjuni huma komuni, iżda dak tat-Tlieta kien wieħed mill-aktar fatali fiċ-Ċina f’dawn l-aħħar snin.
It-terremot, li kejjel qawwa ta’ 7.1 fuq l-iskala Richter, inħass ukoll fin-Nepal u f’partijiet oħra tal-Indja.
