Monday, November 16, 2026
Home Internazzjonali Mijiet ta’ rġiel jinżlu fit-toroq fl-Iżvizzera biex jipprotestaw kontra l-vjolenza fuq in-nisa

Mijiet ta’ rġiel jinżlu fit-toroq fl-Iżvizzera biex jipprotestaw kontra l-vjolenza fuq in-nisa

0
25

Mijiet ta’ rġiel ħadu sehem f’dimostrazzjoni fil-kapitali Żvizzera, Bern, sabiex jesprimu l-oppożizzjoni tagħhom għall-vjolenza fuq in-nisa. Huma appellaw biex l-irġiel jieħdu rwol aktar attiv u effettiv fil-ġlieda kontra dawn il-problemi.

Id-dimostrazzjoni, li saret is-Sibt quddiem il-bini tal-Parlament Żvizzeru, kienet organizzata taħt l-isem “Irġiel Kontra l-Vjolenza fuq in-Nisa”. Din saret fid-dawl tat-tħassib dejjem jikber dwar it-tixrid ta’ ideat li qed ikun hemm fuq l-internet, b’mod partikolari fost subien adoloxxenti u rġiel żgħażagħ.

L-organizzaturi saħqu li hemm bżonn li aktar irġiel joħorġu jitkellmu kontra dawn l-attitudnijiet u jgħinu biex jinħoloq messaġġ aktar b’saħħtu favur ir-rispett u l-ugwaljanza.

Parti minn din il-problema hija marbuta ma’ dak li hu magħruf bħala l-“manosphere”, netwerk informali ta’ fora online u persuni influwenti fuq il-midja soċjali li jippromwovu s-supremazija maskili u attitudnijiet ostili lejn il-femminiżmu.

Skont it-tħassib espress minn dawk li qed jikkampanjaw kontra dawn l-ideat, l-influwenza ta’ dawn il-persuni kompliet tikber wara r-rebħa elettorali ta’ Donald Trump fl-elezzjoni presidenzjali Amerikana tal-2024, u wasslet biex jiżdiedu l-kummenti dispreġġjattivi u t-theddid kontra n-nisa fuq l-internet.

Christoph Gosteli, ħaddiem soċjali ta’ 42 sena li kien fost il-persuni li organizzaw id-dimostrazzjoni flimkien mal-grupp magħruf bħala “maenner”, qal li l-irġiel huma wkoll parti mill-problema tal-vjolenza fuq in-nisa u l-persuni queer.

“Għalhekk huwa importanti li nieħdu pożizzjoni ċara u ngħidu li ma rridux nibqgħu nkunu parti mill-problema, iżda rridu nkunu parti mis-soluzzjoni,” sostna Gosteli. 

Id-dimostrazzjoni kellha l-għan li tibgħat messaġġ ċar li l-ġlieda kontra l-vjolenza abbażi tal-ġeneru mhijiex biss responsabbiltà tan-nisa, iżda teħtieġ ukoll l-involviment attiv tal-irġiel sabiex tinħoloq soċjetà aktar sigura u bbażata fuq ir-rispett lejn kulħadd.

LEAVE A REPLY

Please enter your comment!
Please enter your name here