Milan rebħu l-Kampjonat Taljan meta marru għand Sassuolo u rebħulhom bl-iskor ta’ 3-0 biex dan kien id-19-il Scudetto fl-istorja tal-club.
Sassuolo v Milan – Kif kien mistenni, Milan akkwistaw ir-rebħa li kellhom bżonn biex rebħu l-kampjonat minkejja li kienu nvoluti f’partita delikata.
Riżultat ta’ draw għar- Rossoneri kien ikun biżżejjed ukoll minħabba l-fatt li minkejja li kienu jintlaħqu minn Inter, il-konfronti diretti kienu favur Milan (2-1 u 1-1).
Intant, il-Milanisti aċċertaw mir-rebħa fl-ewwel taqsima meta daħlu jistrieħu fil-vantaġġ ta’ 3-0 bil-protagonista jkun Olivier Giroud (17, 32) li skorja doppjetta bil-goal l-ieħor jasal minn Franck Kessie (36) li għalih din kienet l-aħħar logħba ma’ Milan qabel jingħaqad ma’ Barcelona.
Inter v Sampdoria – Inter għelbu lil Sampdoria bl-iskor ta’ 3-0 li ma swiet għal xejn hekk kif spiċċaw fit-tieni post.
Il-goals tan-Nerazzurri waslu minn Ivan Perisic (49) u doppjetta ta’ Joaquin Correa (55, 57).
Spezia v Napoli – Napoli temmew fuq nota pożittiva meta marru għand Spezia u ħarġu rebbieħa bl-iskor ta’ 3-0.
L-iskorers tagħhom kienu Matteo Politano (4), Piotr Zielinski (25) u Diego Demme (36).
Wara l-partita l-coach, Luciano Spalletti, ikkundanna l-aġir tal-ultras Naplitani minħabba l-inċidenti li kellhom kontra l-partitarji ta’ Spezia.
Barra minn hekk ta indikazzjoni li d-difensur Kalidou Koulibaly jista’ jħalli lil-club.
Genoa v Bologna – Genoa laqgħu lil Bologna u sfaw megħluba bl-iskor ta’ 1-0. Prattikament din il-partita kienet biss formalitá minħabba li Genoa kienu diġá tilfu posthom fl-ogħla diviżjoni wara 15-il sena.
L-uniku goal tal-logħba wasal minn Musa Barrow (66).
Atalanta v Empoli – Atalanta komplew jinkurunaw staġun mill-aktar diżappuntanti meta f’darhom sfaw megħluba minn Empoli bl-iskor ta’ 1-0 biex fallew milli staġun ieħor jikkompetu f’kompetizzjoni Ewropea.
Il-goal ta’ Empoli ġie skorjat minn Leo Stulac (79) biex b’hekk il-Bergamaschi temmew fit-tmien post.
Fiorentina v Juventus – Fiorentina kkwalifikaw fil-UEFA Conference League meta fl-aħħar logħba tal-kampjonat Taljan għelbu lil Juventus bl-iskor ta’ 2-0, b’dawn tal-aħħar ikunu diġá aċċertati mir-raba’ post li jfisser kwalifikazzjoni għall-UEFA Champions League.
Il-goals tal-Viola waslu minn Alfred Duncan (45) u Nicolas Gonzales (92 pen).
Lazio v Verona – F’partita pjaċevoli, Lazio u Verona qasmu sitt goals.
L-iskorers ta’ Verona kienu Giovanni Simeone (6), Kevin Lasagna (14) u Martin Hongla (76) filwaqt li Jovane Cabral (16), Felipe Anderson (29) u Pedro (62) għamlu rimonta u tefgħu lil Lazio fil-vantaġġ b’mod temporanju.
