Hugo Hernan Maradona twieled fil-belt Arġentina ta’ Lanus nhar id-9 ta’ Mejju 1969 u llum il-ġurnata għandu 52 sena. Huwa magħruf bħala El Turco u huwa ħu l-leġġenda Diego Armando Maradona.
Fi żmienu kien jilgħab bħala player f’nofs il-ground fejn dar diversi pajjiżi u lagħab ma’ Argentinos Juniors (Arġentina), Ascoli (Italja), Rayo Vallecano (Spanja), Rapid Vienna (Vjenna) u Avispa Fukuoka (Ġappun) fost oħrajn.
Il-livell tiegħu ma kienx xi wieħed eċċezzjonali bħal ta’ ħuh tant li rrappreżenta lil pajjiżu fil-livell ta’ Taħt is-16-il sena fejn lagħab 11-il darba u skorja erba’ goals.
Fl-1999, huwa ddeċieda li jdendel iż-żarbun tal- football darba għal dejjem fl-etá pjuttost żgħira ta’ 30 sena.
Minn hemm huwa ddeċieda li jqatta’ madwar ħames snin għal kwiet f’belt twelidu sakemm, fis- sena 2004, huwa ġie ngaġġat minn Puerto Rico Islanders sabiex ikun il-coach tagħhom. Dan it-team kien jipparteċipa fl-ogħla diviżjoni tal-pajjiż fejn għamel staġun magħhom.
Aktar tard, huwa ddeċieda li jwettaq dmiru ta’ coach mat-tfal u ż-żgħażagħ partikolarment fil-belt ta’ Napoli, il-post fejn ħuh Diego lagħab għal diversi snin.
Riċentement Hugo kien Malta fejn mexxa kamp ta’ taħriġ fi ħdan Qormi Football Nusery.
Filwaqt li faħħar il-faċilitajiet li hemm fil-kumpless tal-football ta’ Qormi innota b’sodisfazzjon li minn dak li segwa, hemm uħud li għandhom talent.
Kif ħassejtek fl-ewwel żjara tiegħek f’Malta?
Nista’ ngħid li ħassejtni tajjeb ħafna. Il-Gżejjer Maltin huma verament sbieħ u bqajt impressjonat b’dak li rajt fil-ftit ġranet li qattajt hawn.
Xtaqt li kieku kelli iktar żmien sabiex il-kamp ta’ taħriġ li kelli f’Ħal Qormi jkun effettiv iżda dawk kienu l-pjani.
Ħadt gost ħafna nara t-tfal jilagħbu u jitħarrġu għax nemmen li dan hu l-futur tal-football Malti.
Rajt tfal u żgħażagħ b’entużjażmu kbir li riedu jitgħallmu iżda fuq kollox li taw il-mija fil-mija tagħhom waqt is-sessjonijiet ta’ taħriġ.
Fuq kollox, xtaqt ħafna li nħarreġ tfal li ġejjin minn ambjenti familjari li joffru ċerti sfidi għax dawn ukoll ħaqqhom jilagħbu l-logħba li tant iħobbu.
Dan il-kamp ta’ taħriġ għandu jservi biex tfal fi ħdan in-nursery jkollhom l-ewwel esperjenzi ta’ taħriġ fuq linji professjonali.
F’din l-intervista ma nistgħux ma nsemmux lil ħuk, il-kbir Diego Armando Maradona. X’tiftakar dwaru u dwar il-logħba li tant kien iħobb?
L-ewwelnett jien iż-żgħir fost tliet ħuti. Diego kien il-kbir u ħija l-ieħor, il-fustani, jismu Raul.
Ħija l-kbir minn dejjem kien iffissat fuq il-football. Dejjem kont tarah bil-ballun u jien mill-ewwel indunajt li kellu xi ħaġa barra min-normal … minn etá żgħira kien straordinarju.
Kien kapaċi jdum idawwar il-ballun fuq saqajh għal numru ta’ minuti apparti li kien iwaqqfu fejn u kif irid hu.
Jien ħadt ħafna mill-pariri tiegħu għalkemm qatt ma rnexxieli nilħaq il-livelli li laħaq hu. Niftakar sew iż-żmien meta lagħab ma’ Barcelona iżda wkoll dawk is-snin sbieħ ta’ Napoli fejn rebbaħ lill-club xi ħaġa li ħadd qatt ma rnexxielu jagħmel.
Darba fost l-oħrajn lgħabna fl-istess team fil-belt Spanjola ta’ Granada proprju f’partita għall-karitá. Kienet xi ħaġa unika li għadni ngħożżha sal-lum il-ġurnata.
Taħseb li għad ikun hemm werriet ta’ Diego, jew nistgħu ngħidu li player bħal Lionel Messi qed jimxi fuq il-passi tiegħu?
Jien naħseb li hemm differenza bejn ħija u Messi. Għalkemm it-tnejn kellhom karriera ta’ suċċess bir-rebħ ta’ diversi unuri, ħija Diego kellu ħafna teknika u mod uniku kif jilgħab bil-ballun.
Lionel Messi hu iktar tattiku filwaqt li għandu viżjoni differenti minn dik ta’ ħija. Minkejja kollox, xorta ngħid li Messi huwa uniku, l-istess bħal ħija. Jien naraha diffiċli ħafna biex nikkumparahom.
X’taħseb dwar l-istaġun ta’ Napoli s’issa?
Napoli kellhom staġun ferm pożittiv s’issa fejn għamlu numru ta’ ġimgħat fl-ewwel post tal-klassifika. Irridu ngħidu li t-team mar tajjeb fl-ewwel parti tal-istaġun għalkemm xi episodji partikolari ftit għenu f’dawn l-aħħar ġimgħat.
Fost l-oħrajn il-players imweġġgħin xejn ma għenu b’mod partikolari f’dawn l-aħħar jiem fejn hemm players fundamentali li jinsabu barra mil-logħob fosthom Laidou Koulibaly, Lorenzo Insigne, Mario Rui, Victor Osimhen u Fabian Pena.
Bla dubju li AC Milan u Inter għandhom team kompetittiv u ma rridux nħallu barra lil Atalanta u fl-istess waqt ma narmix lil Juventus li wkoll ġejjin f’tagħhom dan l-aħħar.
Taħseb li Napoli kapaċi jirbħu l-UEFA Europa League?
Jien nemmen li kapaċi jagħmluha minħabba li għandhom skwadra b’saħħitha għalkemm irridu naraw kemm ix-xorti se tkun qed tidħkilhom u fuq kollox nittama li sa Marzu ċerti players li jinsabu barra … jkunu rkupraw.
Barra minn hekk hemm ukoll it-tazza tan-Nazzjonijiet Afrikani fejn anke hawn il-players ukoll jistgħu jsofru xi injury u dan jaf jeffettwa l-istaġun.
Madankollu ntenni li nemmen fil-potenzjal ta’ dan it-team.
Kif rajtu jinbidel il-football miż-żmien meta kont tilgħab int għal dak tal-lum?
Jien nara li l-football baqa’ l-istess fl-istil kif jintlagħab. Forsi
llum il-ġurnata hawn iktar pressjoni mill-players biex ikollhom wirjiet tajbin aktar u aktar għax jitħallsu somom kbar ta’ flus.
Il-players qed jilagħbu football ibbażat fuq ġiri u inqas teknika. It-tattika qed tiddomina ħafna … bil- coaches jidhru li qed itejbu ħafna l-livell tagħhom.
Minkejja kollox, rajt titjib konsidervoli f’dawn l-aħħar snin fejn għandu x’jaqsam infrastruttura speċjalment għax fi żmienna konna nilagħbu fuq art iebsa li ġeneralment tkun taż-żrar.
Illum il-wiċċ sintetiku huwa wieħed uniku u naqqas dik it-tbatija li ħafna bħali għaddejna minnha.
X’tixtieq tgħidilhom lill- partitarji Maltin li jżommu ma’ Napoli?
Irrid ngħid li bqajt mistagħġeb li hawn numru sabiħ ta’ partitarji ta’ Napoli fil-Gżejjer Maltin.
Għandek tgħid issib persuni li jappoġġjaw lil Partenopei f’kull rokna tad-dinja!
Ovvjament jien nieħu din l-okkażjoni sabiex inħeġġiġhom dejjem jappoġġjaw lit-team favorit tagħhom.
Madankollu rridu nemmnu li t-team kapaċi jirbaħ il-kampjonat u għalhekk is-sostenn tal-partitarji huwa importanti.
Nixtieqek tgħaddi l-aħħar messaġġ lil dawk it-tfal u ż-żgħażagħ li jixtiequ jaqbdu karriera fil-football.
L-ewwelnett importanti li meta t-tfal u ż-żgħażagħ jilagħbu l-football, ikunu qed jieħdu pjaċir. Il-gost li tilgħab il-football huwa kbir immens.
B’xorti ħażina qed ikun hemm sitwazzjonijiet fejn il-ġenituri u xi kultant anke l-coaches ipoġġu pressjoni żejda fuq il-players iż-żgħar.
Dan m’għandux ikun għax il-football huwa sensazzjoni ta’ pjaċir u s-sodisfazzjon tieħdu meta tara players jirnexxu għax ikun qed jilagħbu bil-qalb.
