Il-ġuri ta’ Yorgen Fenech kompla lbieraħ b’aktar xhieda forensika u evidenza relatata max-xena tal-qtil ta’ Daphne Caruana Galizia, hekk kif il-ġurati ġew ippreżentati b’uħud mill-aktar provi grafiċi li dehru s’issa.
L-esperti tas-Scene of Crime Officers (SOCO) u tal-Netherlands Forensic Institute spjegaw kif inġabret u ġiet ippreservata l-evidenza mix-xena, filwaqt li ġew ippreżentati ritratti tal-vettura, tal-fdalijiet elevati u tal-ġisem tal-vittma wara l-isplużjoni, inklużi ritratti meħuda waqt l-awtopsja. L-Ispettur Kevin Manicolo ta wkoll deskrizzjoni dettaljata tal-ġrieħi li sofriet Caruana Galizia.
Il-ġurija semgħet ukoll ix-xhieda ta’ xhud li kien għaddej minn Bidnija fil-ħin tal-isplużjoni u li qal li ra l-karozza tittajjar għal ġo għalqa wara żewġ splużjonijiet, kif ukoll partijiet tal-ġisem jittajru fid-direzzjoni tiegħu. Aktar tard resaq lejn Matthew Caruana Galizia, li kkonfermalu li l-vittma kienet ommu.
Żewġ residenti ta’ Bidnija xehdu li fil-ġimgħat ta’ qabel il-qtil kienu nnutaw vetturi suspettużi pparkjati ripetutament fiż-żona, fosthom karozza bajda tal-kiri u Peugeot ta’ lewn fidda.
Esperti Olandiżi kkonfermaw ukoll ir-rapporti forensiċi dwar ix-xena tar-reat u l-analiżi tal-mobile ta’ Daphne Caruana Galizia. Wieħed mill-esperti qal li l-ġurnalista kienet qed taħdem fuq seba’ xenarji investigattivi differenti meta nqatlet, filwaqt li kkonferma fil-kontro-eżami li Yorgen Fenech ma kienx jissemma f’dawk ix-xenarji kif identifikati fir-rapport tiegħu.
Matul is-seduta xehdu wkoll diversi uffiċjali tal-Pulizija dwar il-ħidma tagħhom fuq il-post fil-minuti u s-sigħat ta’ wara l-isplużjoni.
Il-ġuri jkompli llum b’aktar xhieda, fosthom mistennija jkomplu jixhdu esperti forensiċi.
Il-prosekuzzjoni qed titmexxa mill-avukati tal-AG Godwin Cini, Anthony Vella, u Danika Vella, bl-Assistent Kummissarju Keith Arnaud u l-Ispettur Kurt Zahra. Id-difiża hija mmexxija mill-avukat Charles Mercieca flimkien ma’ Gianluca Caruana Curran. Għall-familja Caruana Galizia qed jidhru l-avukati Therese Comodini Cachia u Jason Azzopardi. L-Imħallef Edwina Grima qed tippresjedi l-ġurija.
