Matul dawn it-tlett ijiem tintlagħab l- ewwel ġurnata tal-Closing Round tal-Malta Premier League fejn it-timijiet kollha jerġgħu jibdew minn żero punti, li iżda, huma kontinwazzjoni tal-Opening Round.
Dan minħabba l-klassifikazzjoni tal-Ewwel Fażi hija mportanti biex fl-aħħar ġurnata tal-Closing Round jitqabblu l-postijiet finali biex jiġu deċiżi dawk it-timijiet li se jilagħbu fil-play-offs għar-rebħ tal- kampjonat kif ukoll dawk għas-salvazzjoni.
Forsi għad hemm min ma fehemx il-format ta’ dan il-kampjonat minħabba li huwa kemmxejn kumpless iżda mal-kors tiegħu, jibda jingħaqad il-kwadru kollu.
Pereżempju, Hibernians, Sliema Wanderers, u Hamrun Spartans, li naqsu milli jikklassifikaw fl-ewwel żewġ postijiet fit-Top Six, xorta waħda għandhom ċans jirbħu t-titlu minħabba li din it-tieni fażi tagħti ċ-ċans lil kull team li jirrimedja u jirkupra mid- diżappunt tal-Ewwel Fażi.
Bla dubju, l-attenzjoni se tkun fuq iċ-champions Hamrun Spartans, li temmew fil-ħames post tat-Top Six. Huma għandhom partita delikata kontra Marsaxlokk.
Floriana, li rebħu l-Ewwel Fażi, jibdew favoriti flimkien ma’ Sliema Wanderers u Hibernians fil- konfronti kontra Naxxar Lions, Zabbar St Patrick u Melita rispettivament.
Partita bilanċjata hija dik bejn Mosta u Gzira United filwaqt Birkirkara jaffrontaw lill-ġirien Balzan.
Kif wieħed jinnota, f’din l-ewwel ġurnata, il-konfronti jlaqqgħu lit-timijiet li spiċċaw fit-Top Six kontra dawk li spiċċaw fil-Bottom Six.
Floriana v Naxxar L. – Dan huwa konfront bejn it-team li spiċċa fil-quċċata tat-Top Six u dak li temm fl-aħħar post tal-Bottom Six … u għaldaqstant Floriana jibdew favoriti netti li jiksbu t-tliet punti kontra Naxxar Lions li ilhom ma jirbħu għal dawn tal-aħħar erba’ partiti li fihom kisbu żewġ punti biss.
Floriana għandhom lil Aleksandros Kouro sospiż. Min-naħa l-oħra, jirritornaw Fernando Rodriguez De Araujo (Floriana) u Fernando Barbosa Pereira (Naxxar L.) minn sospensjoni.
Fil-fażi preċedenti, Floriana għelbu lin-Naxxarin bl-iskor ta’ 2-0.
Marsaxlokk v Hamrun S. – Din hija l-aqwa partita ta’ dan il-programm hekk kif Marsaxlokk jimmiraw li jagħmlu double fuq Hamrun Spartans wara li fl-Ewwel Fażi kienu għelbuhom bl-iskor ta’ 3-2.
Fl-istess waqt, ix-Xlukkajri jridu jpattu għad-diżappunt li kellhom jikkuntentaw li jilagħbu fil- Bottom Six wara bidu ferm ħażin meta sofrew ħames telfiet konsekuttivi qabel ma ġie ngaġġat il-coach Taljan, Enzo Potenza.
Huma se jilagħbu kontra team li se jkun trasformat minn dak tal-fażi preċedenti li fiha safa megħlub xejn inqas minn sitt darbiet.
Infatti huma bdew isaħħu l-iskwadra tagħhom b’għadd ta’ akkwisti ġodda.
Għaldaqstant, il-pressjoni tinsab fuq l-Ispartans hekk kif ma jistgħux ifallu.
Marsaxlokk ma jistgħux jinkludu lis-sospiżi, Jai Quitongo u Lucas Lopez Dessypris.
Min-naħa l-oħra, l-Ispartans se jkunu msaħħa bir- ritorn ta’ Luke Montebello, Elionay Freitas Da Silva u Raphael Lopes Silva, minn sospensjoni.
Zabbar SP v Sliema W. – Sliema Wanderers, li spiċċaw fit-tielet post tat-Top Six jiltaqgħu kontra Zabbar St Patrick li temmew fir-raba’ pożizzjoni tal-Bottom Six.
Minkejja li l-Wanderers jibdew favoriti, huma jridu juru rispett lil team li fl-aħħar erba’ ħarġiet tiegħu kiseb tliet rebħiet u draw.
Peró, iż-Żabbarin ma jistgħux jagħmlu użu mis- sospiżi, Brian Ariel Gambarte u Joao Pedro Sa Mendonca.
Fil-fażi preċedenti, is-Slimiżi kienu ħarġu rebbieħa bl-iskor ta’ 2-0.
Melita v Hibernians – L-objettiv ta’ Hibernians, li ddiżappuntaw fl-Ewwel Fażi, huwa li jtemmu fl-ewwel żewġ postijiet ta’ din it-Tieni Fażi biex ikunu jistgħu jidħlu fil-play-offs deċiżivi u għaldaqstant il-pressjoni tibda taħkem fuqhom minn din l-ewwel partita … minħabba li ma jistgħux ifallu.
Huma se jilagħbu kontra team li spiċċa barra miż-żona tar-relegazzjoni u li fl-aħħar partiti tiegħu bħal donnu qabad ir-ritmu.
Iż-żewġ timijiet għandhom players neqsin għax sospiżi. Hibernians għandhom lil Miullen Felicio Carvalho u Higor Gabriel Fernandes Alves filwaqt li Melita għandhom lil Joao Andres Yepez Morlets iżda jirritorna għalihom Aldair Simanca Pena.
Fl-ewwel fażi, il-Pawlisti għelbu lill-Ġiljaniżi 2-0.
Mosta v Gzira U. – Din hija partita bejn it-team li spiċċa l-aħħar fit-Top Six, Mosta, kontra Gzira United li spiċċaw fil-quċċata talBottom Six.
Inċidentalment, l-unika rebħa li Mosta rreġistraw fit-Top Six kienet fuq Hamrun Spartans bl-iskor ta’ 2-1.
Huma se jinżlu għal din il-partita bl-aqwa formazzjoni possibbli filwaqt li Gzira għandhom lil Thaylor Aldama u Marcelo Dias sospiżi iżda jirritorna Zach Scerri minn sospensjoni.
Fil-fażi preċedenti, il- Maroons għelbu lil Mosta bl-iskor ta’ 2-0.
Birkirkara v Balzan – Balzan iridu jinsew l-Ewwel Fażi wara li spiċċaw fil-post ta’ qabel l-aħħar fil-Bottom Six.
Huma jibdew l-impenji tagħhom kontra Birkirkara li għalihom jirritorna Alessandro Coppola minn sospensjoni.
– Cristian Muscat
