Ix-xogħlijiet fuq it-tielet pont qed javvanzaw, flimkien ma’ xogħlijiet estensivi fuq is-servizzi taħt l-art u strutturi madwar il-proġett kollu.
Il-proġett ta’ Msida Creek qed jidħol f’fażi oħra importanti, hekk kif qed javvanzaw ix-xogħlijiet fuq it-tielet pont li, fil-ġimgħat li ġejjin, se jintroduċi rotta diretta ġdida li tgħaqqad lil Birkirkara mal-Belt Valletta.
Minn meta nfetħet il-Pjazza l-ġdida tal-Imsida, Infrastructure Malta kompliet taħdem fuq id-diversi elementi ta’ dan il-proġett kbir, u b’mod progressiv qed tittrasforma ż-żona u twassal infrastruttura ġdida mfassla biex ittejjeb il-konnettività, il-fluss tat-traffiku u l-esperjenza tan-nies li jivvjaġġaw minn u madwar l-Imsida.
Il-ftuħ tal-Pjazza tal-Imsida mmarka pass importanti fil-proġett, billi ħoloq spazju pubbliku ġdid filwaqt li biddel b’mod sinifikanti n-netwerk tat-toroq fiż-żona. Ix-xogħlijiet komplew madwar is-sit hekk kif Infrastructure Malta qed tavvanza għall-istadji li jmiss tal-proġett, inkluż il-kostruzzjoni u t-tlestija tal-konnessjonijiet il-ġodda tal-pontijiet.
Waħda mill-aħħar operazzjonijiet tinvolvi l-installazzjoni ta’ pannelli tal-ħitan prefabbrikati fuq it-tielet pont. Dawn l-elementi kbar prefabbrikati qed jiġu installati waqt operazzjonijiet billejl biex jitnaqqas l-impatt fuq it-traffiku, filwaqt li x-xogħlijiet speċjalizzati jkunu jistgħu jsiru b’mod aktar sigur u effiċjenti.
L-użu ta’ elementi prefabbrikati jippermetti wkoll proċess ta’ installazzjoni aktar mgħaġġel u preċiż, u jnaqqas iż-żmien meħtieġ għall-attivitajiet ta’ kostruzzjoni direttament fuq is-sit.
Fl-istess ħin, qed isiru investimenti u xogħlijiet sinifikanti taħt l-art biex titwassal l-infrastruttura u s-servizzi meħtieġa għall-proġett komplut. Dawn ix-xogħlijiet jinkludu t-tqegħid ta’ madwar 1.3km ta’ pajpijiet ġodda għall-ilma tax-xorb u konnessjonijiet mad-djar, sistemi tad-drenaġġ, cables u infrastruttura tal-Enemalta u tat-telekomunikazzjoni. Dawn ix-xogħlijiet huma parti importanti mit-trasformazzjoni usa’ taż-żona, u jiżguraw li t-toroq u l-infrastruttura pubblika l-ġdida jkunu sostnuti minn servizzi mtejba taħt l-art.
Sar ukoll ammont sinifikanti ta’ xogħol strutturali bħala parti mill-proġett. Dan jinkludi t-tħaffir u t-tferrigħ tal-konkos ta’ 25 conrete piles rinfurzat għall-parkeġġ il-ġdid, l-installazzjoni ta’ madwar 100 metru ta’ sheet piles biex jiġi ffaċilitat il-ħolqien tal-kanal, u t-tneħħija ta’ madwar 500 metru kubu ta’ materjal inert biex jinħoloq il-kanal innifsu.
Ix-xogħlijiet fuq il-kanal qed javvanzaw flimkien mal-kostruzzjoni tal-istrutturi assoċjati, inkluż it-tqegħid ta’ madwar 90 metru kwadru ta’ pannelli tal-konkos li jiffurmaw il-qiegħ tal-kanal u l-kostruzzjoni ta’ madwar 40 metru ta’ ħajt ta’ sostenn għall-pont il-ġdid tal-konkos li se jgħaddi minn fuq il-kanal.
Qed issir ukoll infrastruttura oħra ta’ appoġġ, inkluż substation elettrika ġdida u faċilitajiet sanitarji ġodda, bħala parti mit-titjib usa’ li qed isir fiż-żona kollha tal-proġett.
It-tielet pont se jservi bħala konnessjoni ġdida importanti fin-netwerk tat-toroq ta’ Msida Creek, billi jipprovdi rotta ġdida għat-traffiku li jivvjaġġa minn Birkirkara lejn il-Belt Valletta. Il-ftuħ tiegħu fil-ġimgħat li ġejjin se jirrappreżenta pass sinifikanti ieħor fit-twettiq tal-proġett u fit-trasformazzjoni usa’ taż-żona tal-Imsida.
Infrastructure Malta qed tkompli tikkoordina l-attivitajiet differenti ta’ kostruzzjoni meħtieġa biex jitlestew il-pont, il-kanal, is-servizzi taħt l-art u l-infrastruttura ta’ konnessjoni, filwaqt li qed tfittex li timminimizza l-inkonvenjenza għall-utenti tat-toroq matul ix-xogħlijiet li fadal.
Il-proġett ta’ Msida Creek jagħmel parti mill-investiment usa’ tal-Gvern fil-modernizzazzjoni tal-infrastruttura tat-trasport ta’ Malta, it-titjib tal-konnettività u l-użu aħjar tal-ispazju tat-toroq eżistenti, filwaqt li joħloq ukoll spazji pubbliċi mtejba għall-komunità.
Bil-Pjazza tal-Imsida diġà lesta, b’infrastruttura estensiva taħt l-art u strutturali issa f’postha, u bit-tielet pont joqrob lejn it-tlestija, il-proġett qed jimxi lejn pass importanti ieħor li se jkompli jtejjeb il-mod kif in-nies jivvjaġġaw bejn iż-żoni ċentrali u tat-Tramuntana tal-gżira u l-Belt Valletta.
