Għar-raba’ ġimgħa konsekuttiva, “Shang-Chi and the Legend of the Ten Rings” baqa’ l-film li ġibed nies l-aktar fil-box office Amerikana. Madankollu, l-aħbar ewlenija kienet li bid-dħul li kellu f’dawn l-aħħar jiem, “Shang-Chi” sar il-film bl-akbar dħul sa issa fil-box office Amerikana tal-2021 meta ssupera d-dħul ta’ “Black Widow”.
Il-musical “Dear Evan Hansen” iddebutta fit-tieni post b’dħul ta’ $7.5 miljun, li kważi hu n-nofs tad-dħul ta’ tlitt ijiem li kellu “Shang-Chi”. “Dear Evan Hansen” li nħadem b’budġit ta’ $28 miljun mar aħjar minn “Cats” fl-opening weekend. “Cats” kien sewa $100 miljun biex inħadem u fl-ewwel tlitt ijiem kellu dħul ta’ $6.5 miljun u meta konna għadna anqas dħalna fil-perjodu tal-pandemija.
Fit-tliet postijiet l-oħra tal-box office Amerikana nsibu: “free Guy”, “Candyman” u fil-ħames post “Cry Macho” in-neo-western ġdid ta’ Clint Eastwood.
Dear Evan Hansen
Dan hu musical drammatiku li bħala film, kellu d-debutt tiegħu fit-Toronto Film Festival aktar kmieni dan ix-xahar. Oriġinarjament inkiteb għal fuq il-palk. Iddebutta f’Broadway fil-Milied tal-2016 u l-play rebħet 6 Tony Awards.
Il-musical inkiteb minn Steven Levenson, Benj Pasek u Justin Paul. Il-film inħadem taħt id-direzzjoni ta’ Stephen Chobsky.
Fil-parti ta’ Evan Hansen jidher Ben Platt, iben il-producer tal-films Marc Platt
Evan Hansen, ikun student fil-high school li jkollu social anxiety disorder severa. Darba huwa jikteb ittra lilu nnifsu bħala parti mit-terapija.
L-ittra kienet intenzjonata li ma jarha ħadd imma l-ittra taqa’ f’idejn il-kollega tiegħu Connor Murphy (Colton Ryan). Ftit wara, Connor iwettaq suwiċidju. Bil-ġenituri ta’ Connor mnikkta u ma jistgħux jifmhu għala binhom għamel hekk, jaħsbu li dik l-ittra kien kitibha binhom biex jagħtiha lil Evan Hansen. “Connor didn’t write this”, Evan jipprova jispjegalhom, imma huma jinsistu li jinterpritaw dik in-nota bħala l-aħħar ħsibijiet ta’ binhom Connor.
In-narrattiva ta’ “Dear Evan Hansen” (Universal Pictures) twassal għall-punt pożittiv li dan l-inċident iservi biex Evan jibda vjaġġ biex jiskopri lilu nnifsu u sabiex finalment jiġi aċċettat minn sħabu l-istudenti – ħaġa li twasslu biex iduq is-sabiħ tal-ħajja li qatt ma kien esperjenza qabel.
Ipparagunat mal-musical fuq il-palk, hemm numru ta’ tibdiliet u anke ġew miżjuda żewġ numri mużikali. Waħda mill-karattri li fil-film hi żviluppati aħjar hi dak ta’ Alana (Amandla Stenberg) li hi fl-istess klassi ma’ Evan u li għandha problemi mentali simili bħal dawk ta’ Evan. Tkun Alana li tipproponi dak li issejjaħlu ‘The Connor Project’ intenzjonat li l-memorja ta’ sħabhom l-istudent Connor tibqa’ ħajja. Meta l-istudenti jitlaqgħu biex isellmu lil Connor, id-diskors ta’ Evan jitqies bħala wieħed indirizzat biex jagħti tama lil kull min ibati minn xi kundizzjoni mentali u depressjoni. Dan id-diskors jinfirex fuq il-midja soċjali. Zoe (Kaitlyn Dever) tkun waħda minn dawk li tħossha ferm aħjar b’dan id-diskors u filwaqt li tirringrazzja lil Evan, tinbeda relazzjoni bejniethom.
Gwida għal min ser jarah: ikklassifikat 12A (persuni taħt it-12-il sena jridu jkunu akkumpanjati minn adult) minħabba t-tema tal-film tinvolvi suwiċidju, hemm ftit kliem mhux xieraq u referenza qosra li huma evokattivi.
The Stronghold
Fis-sezzjoni mhux kompetittiva tal-festival ta’ Cannes ta’ din is-sena, intwera thriller Franċiż li ħalla impressjoni mal-kritiċi u mal-pubbliku, tant li issa hu disponibbli fuq pjattaforma diġitali u hu dubbed bl-Ingliż. Qegħdin nirrferu għal “The Stronghold”. L-isem oriġinali hu “BAC Nord”.
Maħdum taħt id-direzzjoni ta’ Cédric Jimenez, in-narrattiva hi bbażata fuq ġrajja vera li seħħet fl-2012 f’Marsilja. Niltaqgħu ma’ tliet pulizija, Greg (Gilles Lellouche) li jmexxi lil sħabu, Yass (Karim Leklou) li għandu lill-martu Nora qed tistenna tarbija, u Antoine (Francois Civil) li jgħix ħajja rilassata. Il-ħbiberija bejn dawn it-tlieta hi żviluppata b’mod tajjeb fl-ewwel parti tal-film u hi l-qofol ta’ kollox lejn l-aħħar.
Iffrustrati li mhux qed isibu tarf tat-traffikar tad-droga minkejja l-qabdiet li jagħmlu, Greg jipprova jikkonvinċi lis-superjur tiegħu biex ikunu aktar aggressivi fl-isforzi tagħhom, anke jekk jgħawwġu xi regoli.
Antoine ikun wieħed li spiss jakkwista informazzjoni minn taħt mingħand waħda jisimha Amel (Kenza Fortas). Din il-mara tkun lesta’ li tatih ħjiel li twassalhom għall-barunijiet tad-droga jekk jagħtiha 5 kg ta’ reżina tal-kannabis. Is-superjur tagħhom ma jkunx jaqbel imma lest li jagħlaq għajn waħda li jwarrbu il-qabdiet żgħar tal-kannabis sakemm ikollhom l-ammont mitlub minn Amel.
Ir-rejd il-kbir isir u jkun suċċess u wieħed jistenna li l-film jagħlaq hemmhekk. Imma l-istorja ma tieqafx hemm. Il-ħjiel ċar hu fil-bidu tal-film, għax jibda b’Greg ikun il-ħabs.
“The Stronghold” (Netflix) hu interessanti għax hu crime film mingħajr il-villain tradizzjonali. L-arresti li saru f’Marsilja fl-2012 kienu taw bidu għal dibattitu mqanqal dwar kemm il-pulizija għandhom ikollhom id-dritt li jagħwġu r-regoli biex jipproteġu liċ-ċittadini.
Gwida għal min ser jarah: ikklassifikat 15 (persuni għal fuq minn 15-il sena) għax fih kliem mhux xieraq, vjolenza mdemmija u użu tad-droga.
