New Zealand ħabbret pjanijiet biex terġa’ tiftaħ il-fruntieri tagħha għal vjaġġaturi barranin wara aktar minn sentejn magħluqa minħabba l-Covid-19.
L-Awstraljani se jitħallew jidħlu fil-pajjiż mingħajr il-bżonn li jagħmlu perjodu ta’ kwarantina jew iżolament mit-13 ta’ April.
Vjaġġaturi mlaqqma b’mod sħiħ minn madwar 60 pajjiż fuq “il-visa-waiver list” se jkunu jistgħu jaslu mit-2 ta’ Mejju li jinkludu r-Renju Unit u l-Istati Uniti. Mal-wasla tagħhom fil-pajjiż iridu jippreżentaw test negattiv tal-Covid.
New Zealand kienet għalqet il-fruntieri tagħha f’Marzu 2020 u baqgħu magħluqa ħlief għall-ivvjaġġar ta’ grupp żgħir ta’ nies mal-Awstralja. Bħalissa ċittadini ta’ New Zealand biss huma permess jidħlu u joħorġu fil-pajjiż.
Il-Prim Ministru Jacinda Ardern qalet li New Zealand tinsab “lesta li tilqa’ lura lid-dinja”.
