Il-Kamra tal-SME’s fl-ewwel reazzjoni tagħha iddikjara b’mod ċar ħafna li tirrikonoxxi l-enfasi tal-Baġit għas-sena 2027 dwar l-istabbilità. Hi iżda qalet li tqajjem tħassib dwar l-isfidi tan-negozji li għandhom mhux indirizzati u anke dwar il-produttività.
Enfasizzat li “l-Kamra tal-SMEs ta’ Malta tilqa’ għadd ta’ miżuri mħabbra fil-Baġit 2027, b’mod partikolari t-tkomplija tas-sussidji fuq l-enerġija, li jipprovdu appoġġ u stabbiltà tant meħtieġa lin-negozji f’kuntest ta’ inċertezza ekonomika internazzjonali li għadha għaddejja. Skont l-aħħar Barometru tal-SMEs, kważi 80 fil-mija tan-negozji li wieġbu qalu li s-sussidji huma essenzjali jew importanti b’mod moderat.”
Fir-reazzjoni tagħha qalet li “minkejja l-intenzjonijiet pożittivi wara ċerti miżuri, l-implikazzjonijiet prattiċi tagħhom u l-effetti indiretti jistgħu joħolqu piżijiet addizzjonali fuq min iħaddem, b’mod partikolari n-negozji ż-żgħar. Eżempju ta’ dan huwa t-tneħħija tal-eliġibbiltà għall-kura tat-tfal b’xejn għall-ħaddiema li huma ċittadini ta’ pajjiżi terzi (TCNs), kif ukoll iż-żieda qawwija fit-tariffi tal-liċenzji tal-permess uniku u fit-tariffi tal-infrastruttura. Dawn iż-żewġ miżuri jistgħu jkomplu jgħollu l-ispejjeż tal-impjieg u jaggravaw in-nuqqas ta’ ħaddiema.”
Hi laqgħet b’mod pożittiv it-tnaqqis fir-rata tat-taxxa korporattiva minn 35 fil-mija għal 25 fil-mija għan-negozji li għandhom dħul mill-bejgħ sa miljun ewro (€1 miljun). Iddikjarat li dan huwa pass fid-direzzjoni t-tajba, u l-Kamra tal-SMEs appellat biex dan it-tnaqqis fit-taxxa jiġi estiż aktar.
Sostniet li “għalkemm il-Gvern jirrikonoxxi l-importanza li tissaħħaħ il-kompetittività ekonomika ta’ Malta, tibqa’ mħassba li, minkejja l-enfasi fuq il-produttività, il-Baġit ma jintroduċix inċentivi jew soluzzjonijiet konkreti biex jgħinu lin-negozji jtejbu l-effiċjenza u jiksbu aktar b’inqas riżorsi. Minflok, ċerti miżuri jistgħu jillimitaw id-disponibbiltà immedjata tal-ħaddiema u jżidu l-piż fuq min iħaddem, mingħajr ma jipprovdu biżżejjed għodod jew appoġġ biex jiġu indirizzati l-isfidi relatati mal-produttività. Il-proposti tal-Kamra tal-SMEs għall-Budget kienu jinkludu numru ta’ miżuri mmirati biex tissaħħaħ il-produttività tal-pajjiż.
Qalet li “barra minn hekk, għad hemm diversi sfidi urġenti li qed ikomplu jaffettwaw lin-negozji u li ma ġewx indirizzati b’mod suffiċjenti.
Dawn jinkludu n-nuqqas persistenti ta’ ħaddiema, il-konġestjoni tat-traffiku, il-kompetizzjoni inġusta u ż-żieda fl-inflazzjoni, flimkien ma’ tħassib ieħor li ġie enfasizzat ripetutament fil-Barometru Trimestrali tal-SMEs. Fid-dawl tar-rapport reċenti tal-PISA, il-Kamra tal-SMEs kienet tistenna miżuri aktar konkreti fir-rigward tas-settur edukattiv. It-titjib fil-produttività għandu jkun sostnut minn miżuri prattiċi li jippermettu lin-negozji jottimizzaw ir-riżorsi tagħhom, jinvestu fl-innovazzjoni u jsaħħu l-kompetittività tagħhom.”
Hi kompliet tgħid li “diversi proposti mressqa mill-Kamra tal-SMEs għadhom ma ġewx indirizzati, fosthom it-twaqqif ta’ task force bejn il-partiti politiċi biex jiġu diskussi u definiti l-prijoritajiet fit-tul ta’ Malta fir-rigward tan-negozji. Il-Kamra tal-SMEs tisħaq li dawn il-proposti m’għandhomx jibqgħu biss impenji fuq il-karta, iżda għandhom iwasslu għal azzjoni konkreta.”