Minn Cristian Muscat
Kif bdiet l-imħabba tiegħek lejn l-atletika?
L-imħabba tiegħi lejn l-atletika ġiet għall-fatt illi minn etá żgħira ommi u missieri kienu jeħduni magħhom peressli t-tnejn li huma jħobbu u jipprattikaw l-atletika.
X’suċċessi maġġuri ksibt fil-karriera tiegħek sa issa?
Is-suċċessi tiegħi li ksibt s’issa huma dawn li ġejjin: midalja fil-4x60m relay ġewwa Brno fir-Repubbika Ċeka, rekord nazzjonali U16 fit-800m ġewwa Londra, ISF Games ġewwa l-Brażil mat-tim nazzjonali U16, FISEC Games 2024, irbaħt medalji fil-Kampjonati ta’ Malta kemm fidda u anke deheb fil-400m u 800m u fil-4x100m relay.
Kif tqis il-livell tal-atletika f’pajjiżna fil-preżent?
Fil-preżent, il-livell tal-atletika Maltija qed jogħla u dan huwa sinjal tajjeb għat-tim nazzjonali Malti illi bosta atleti stabbiliti qed iġibu riżultati pożitivi kemm lokalment u anke fix-xena internazzjonali fosthom l-iktar riċenti l-ammont ta’ midalji fil-Logħob tal-Pajjiżi ż-Żgħar (GSSE) tal-2023.
U dak tar-riżorsi fejn titħarrġu u jkollkom il-kompetizzjonijiet uffiċjali tagħkom?
Ir-riżorsi saru tajbin ħafna fejn issa għandha anke l-kumditajiet kollha li jirrikjedi l-isport tagħna fosthom trakka internazzjonali ta’ livell għoli, gym, u ‘ice baths’, fost oħrajn.
Kif qed tħares lejn il-futur tiegħek fl-atletika?
Ottimista ħafna li għall-futur inkun fost l-atleti fit-tim nazzjonali Malti u x-xewqa tiegħi hi dik li għall-anqas nikseb is-suċċessi li qiegħda tikseb ommi, Lisa Marie Bezzina.
Għaddi messaġġ finali lil min jixtieq jagħmel karriera ta’ suċċess fl-atletika.
Li qatt ma taqta’ qalbek u tissieħeb ma’ klabb biex tkun tista’ timxi aktar ‘il quddiem!
