Il-Ġappun kisbu rebħa storika ta’ 3-2 kontra l-Brażil f’logħba ta’ ħbiberija internazzjonali, wara li rnexxielhom jdawru telfa ta’ żewġ goals f’rebħa spettakolari.
Il-Brażil marru fil-vantaġġ permezz ta’ Paulo Henrique fis-26 minuta, qabel Gabriel Martinelli rdoppja sitt minuti wara biex l-ewwel taqsima ntemmet 2-0.
Madankollu, il-Ġappun wettqu reazzjoni impressjonanti fit-tieni taqsima. Takumi Minamino naqqas id-distakk fit-52 minuta, filwaqt li Keito Nakamura kiseb id-draw għaxar minuti wara.
Il-gowl tar-rebħa wasal fil-71 minuta meta Ayase Ueda skorja permezz ta’ daqqa ta’ ras minn corner ta’ Junya Ito.
B’hekk, il-Ġappun irreġistraw l-ewwel rebħa tagħhom kontra l-Brażil fl-istorja, wara 14-il konfront bejn iż-żewġ nazzjonijiet.
