Kien xokk kbir għall-familji tal-vittmi tal-attakk b’bomba f’Lockerbie fejn dalgħodu kellu jibda l-ġuri fil-konfront ta’ Abu Agila Masud. Ftit tal-ħin qabel beda, il-Qorti f’Washington DC qalet li se tipposponi l-ġuri minħabba li d-difiża qalet li għandha evidenza ġdida.
Il-proċess tal-għażla tal-ġurija kien mistenni jibda f’Washington DC għal Masud, li huwa akkużat li bena l-bomba li splodiet fuq it-titjira Pan Am 103 fl-1988, u li ħasdet il-ħajja ta’ 270 persuna.
Irid jingħad li l-isplużjoni ta’ Pan Am, għandha rabta importanti ħafna ma’ Malta, għax waħda mill-provi ċentrali tal-investigazzjoni kienet tikkonċerna bagalja u ħwejjeġ mixtrija minn Sliema.
Il-każ tal-prosekuzzjoni u l-konklużjoni tal-Qorti fil-proċess ta’ Lockerbie kien li fis-7 ta’ Diċembru 1988, inxtraw diversi ħwejjeġ minn ħanut jismu Mary’s House fi Triq it-Torri, Tas-Sliema. Biċċiet minn dawn il-ħwejjeġ instabu fost il-fdalijiet tal-ajruplan. Il-prosekuzzjoni sostniet li l-ħwejjeġ kienu ġew mixtrija minn Abdelbaset al-Megrahi, uffiċjal tas-Servizz Sigriet Libjan, li aktar tard instab ħati tal-attakk. Il-bomba kienet moħbija f’radio-cassette player Toshiba, f’bagalja Samsonite.
Skont il-Qorti, il-bagalja kienet intbagħtet bħala bagalja mhux akkumpanjata minn Luqa fuq titjira tal-Air Malta KM180 lejn Frankfurt. Minn Frankfurt, allegatament ġiet trasferita fuq Pan Am 103A lejn Heathrow, u minn hemm fuq Pan Am Flight 103, li kien sejjer lejn New York.
Ir-rabta tal-bagalja ma’ Malta kienet waħda mill-aktar punti kontroversjali fil-każ. Il-Qorti kienet aċċettat li l-evidenza kienet tippermetti l-konklużjoni li bagalja mhux akkumpanjata kienet ġiet trasferita minn KM180 għall-vjaġġ lejn Heathrow. Madankollu, ma kienx hemm xhud dirett li ra l-bagalja bil-bomba titgħabba fuq l-ajruplan f’Malta. Il-kwistjoni dwar jekk il-bagalja daħlitx fis-sistema tal-bagalji f’Malta, Frankfurt jew anke Heathrow baqgħet suġġett ta’ dibattitu u appell.
Intant l-Imħallef Distrettwali tal-Istati Uniti Dabney Friedrich ipposponiet il-proċeduri wara li l-avukati tad-difiża semmew “evidenza li għadha kif instabet” u li teħtieġ aktar eżami.
It-traġedja tal-1988 tibqa’ l-agħar attakk terroristiku fuq art Brittanika, fejn tilfu ħajjithom 259 passiġġier u membru tal-ekwipaġġ flimkien ma’ 11-il resident lokali li kienu fl-art.
Kara Weipz, il-president tal-assoċjazzjoni għall-vittmi ta’ Pan Am Flight 103, u li tilfet lil ħuha Rick Monetti f’din l-atroċità tkellmet dwar din l-aħbar dwar il-ġuri.
“Illum bqajt ixxukkjata meta sirt naf b’din l-aħbar tassew ixxukkjata,” qalet Kara.
“Kien hemm ħafna ansjetà hekk kif konna qed nersqu lejn din il-ġimgħa, u mbagħad, meta sirna nafu li f’daqqa waħda mhux se jsir issa, irridu nibqgħu ngħixu b’din l-ansjetà għal kemm-il darba jkun hemm bżonn sakemm finalment naslu għall-proċess.”
Minkejja dan id-dewmien, hija tittama li ż-żmien żejjed iwassal għal ġustizzja sħiħa għall-familjari kollha affettwati. “Irridu l-verità,” żiedet tgħid Kara. “Irridu nkunu nafu x’ġara. U jekk dan iwassal għalhekk, allura dan iż-żmien ikun jiswa l-isforz.”
Laura Buchan, il-kap tat-tim tal-investigazzjoni dwar Lockerbie fi ħdan il-Crown Office tal-Iskozja, ukoll irrikonoxxiet l-impatt emozzjonali fuq il-qraba tal-vittmi.
“Nifhem li dan id-dewmien se jkun ta’ diżappunt għall-familji u għal dawk li ilhom isegwu dan il-każ għal ħafna snin,” qalet Buchan.
“Il-prosekuturi u l-uffiċjali tal-pulizija Skoċċiżi jibqgħu impenjati bis-sħiħ biex jappoġġjaw it-tfittxija għall-ġustizzja,” temmet tgħid Buchan.
