Wara t-telfa kontroversjali li sofrew kontra Tottenham Hotspur bl-iskor ta’ 2-1, il-ġimgħa li għaddiet, Liverpool marru għand Brighton u spiċċaw bl-iskor ta’ 2-2 liema partita setgħet marret kull naħa.
Kien Simon Adingra (20) li fetaħ l-iskor għal Brighton wara żball ta’ Virgil van Dijk.
Iżda Mohamed Salah (40, 45) dawwar l-iskor għal 2-1 bit-tieni wieħed jasal minn penalty f’liema azzjoni kellu jitkeċċa Pascal Gross meta waqqa’ lil Dominik Szoboszlai meta kien f’pożizzjoni li seta’ jiskorja.
Peró, Brighton ġew imċaħħda minn penalty meta van Dijk mess il-ballun b’idu fil-kaxxa.
U filwaqt li Ryan Gravenberch ġie mċaħħad mil-lasta għal Liverpool, Lewis Dunk (78) kiseb id-draw għas-Seagulls minn azzjoni ta’ free-kick.
West Ham v Newcastle – West Ham u Newcastle spiċċaw fi draw ta’ 2-2, hekk kif il-Hammers skorjaw l-ewwel u l-aħħar minn Tomas Soucek (8) u Mohammed Kudus (89) filwaqt li l-protagonsita għall-Magpies kien Alexander Isak (56, 62) li rreġistra doppjetta.
Wolves v Aston Villa – Wolves laqgħu lil Aston Villa, fid-derby tal-West Midlands, u temmew fi draw ta’ 1-1.
Kien Hee-Chan Hwang (53) li skorja ġmiel ta’ goal għal Wolves iżda ma tantx damu jifirħu b’dan il-goal minħabba li żewġ minuti wara Pau Torres kiseb id-draw għall-Villans.
Wolves kellhom lil Mario Lemina (93) imkeċċi għal żewġ karti sofor.
