minn Cristian Muscat
Matul dawn it-tlett ijiem tintlagħab is-sitt ġurnata tal-Malta Premier League, b’għadd ta’ partiti mill-aktar interessanti bl-attenzjoni prinċipali ddur fuq il-partita bejn Floriana u Gzira United, li huma t-team rivelazzjoni tal-istaġun hekk if jinsabu fit-tielet post.
Iċ-champions Hamrun Spartans, li jinsabu ħames punti taħt il-leaders Birkirkara, jilagħbu kontra Naxxar Lions filwaqt li l-istess Karkariżi għandhom partita mill-aktar delikata meta jiltaqgħu kontra l-ġirien Mosta.
Sliema Wanderers jibdew favoriti li jiksbu t- tliet punti kontra Melita li bdew l-istaġun fuq nota tajba, li iżda, sofrew tliet telfiet.
Hibernians jaffrontaw lil Zabbar St Patricks li qed jagħtu sfida denja lil kull avversarju filwaqt li Marsaxlokk, l-uniku team mingħajr l-ebda punti, jiltaqgħu ma’ Balzan.
Floriana v Gzira U. – Bla dubju, dan huwa l-aqwa konfront li huwa meqjus bħala wieħed bilanċjat u li jista’ jmur kull naħa.
Il-Greens ġejjin minn draw ta’ 1-1 kontra Hibernians liema partita setgħu rebħu iżda kellhom jilagħbu l-aħħar nofs siegħa bi player nieqes minħabba li tkeċċa d-difensur, Oualid El Hasni, li bla dubju se jinħass in-nuqqas tiegħu hekk kif jinsab sospiż.
Min-naħa tal-Maroons, dawn ġejjin minn draw ta’ 2-2 kontra Sliema Wanderers hekk kif salvaw ir-riżultat fil-ħin miżjud biex kienu huma li nifdu x-xibka Slimiża għall-ewwel darba f’dan l-istaġun meta kienet intatta għal seba’ logħbiet.
Il-midfielder mill-Kamerun, Joseph Minala, huwa nieqes għall-Gżirjani hekk kif ikun qed jiskonta t-tieni sospensjoni minn tlieta.
Naxxar L. v Hamrun S. – Din hija partita li fiha Hamrun Spartans ma jistgħux iwaqqgħu aktar punti minħabba l-biżgħa li jistgħu jaqtgħu l-kuntatt mal-leaders hekk kif jinsabu distakkati b’ħames punti.
Fl-aħħar żewġ ħarġiet huma fallew ħames punti wara t-telfa ta’ 1-0 kontra Mosta u d-draw ta’ 1-1 kontra Balzan.
Peró, wieħed irid jgħid ukoll li kif inhuwa l-format tal-kampjonat, l-Ispartans jistgħu jirkupraw fit-tieni fażi hekk kif kollox jerġa’ jibda mill-ġdid.
Interessanti huwa l-fatt ukoll li dan se jkun l-34 konfront bejn dawn iż-żewġ timijiet fejn kienet f‘okkażjoni waħda biss li n-Naxxarin ħarġu rebbieħa – fit-3 ta’ Mejju, 1997, bl-iskor ta’ 1-0.
L-Ispartans se jkunu msaħħa bir-ritorn ta’ Ryan Camenzuli minn sospensjoni.
Zabbar SP v Hibernians – Hibernians jiltaqgħu kontra t-team promoss ta’ Zabbar St Patrick hekk kif iż-żewġ timijiet ġejjin minn riżultat ta’ draw … il-Pawlisti bl-iskor ta’ 1-1 kontra Floriana filwaqt li ż-Żabbarin temmew bl-iskor ta’ 3-3 kontra n-Naxxar Lions.
Dawn iż-żewġ timijiet iltaqgħu 18-il darba fl-ogħla diviżjoni fejn is-Saints ħarġu rebbieħa darba waħda biss … iżda mhux fil-ground. Wara li l-partita ta’ nhar it-30 ta’ Marzu, 1952, il-Pawlisti ħarġu rebbieħa bl-iskor ta’ 8-1, Żabbar ingħataw ir-rebħa wara li Hibernians għamlu użu minn player ineliġibbli.
Għal din il-partita, iż-żewġ timijiet għandhom player sospiż – Strahinja Jovancic għal Zabbar u Higor Gabriel Fernandes Alves għal Hibernians.
Marsaxlokk v Balzan – Taħt it-tmexxija tal-coach il-ġdid, Enzo Potenza, Marsaxlokk jimmiraw li jiksbu l-ewwel punti hekk kif jinsabu fil-qiegħ tal-klassifika.
It-Taljan Potenza, li ħa post Winston Muscat wara sensiela negattiva hekk kif sofra ħames telfiet konsekuttivi, ma għandu bżonn tal-ebda introduzzjoni fil- kamponat Malti meta mexxa lit-timijiet ta’ Senglea Athletic, Floriana (li magħhom rebaħ il-kampjonat fl-2019-20), Sta Lucia u Valletta.
Huma se jilagħbu kontra Balzan li neqsin mill-konsistenza, tant, li jinsabu fit-tmien post liema pożizzjoni hija diżappuntanti għal-livell tagħhom.
Huma ġejjin minn draw ta’ 1-1 kontra Hamrun minkejja li fl-aħħar 10 minuti lagħbu bi player inqas meta tkeċċa Henri Braham Stanic u għaldaqstant huwa sospiż. Iżda Nikola Zerjal jirritorna minn sospensjoni.
Mosta v Birkirkara – Birkirkara għandhom partita diffiċli meta jaffrontaw lil Mosta li ġejjin minn żewġ rebħiet konsekuttivi – kontra Hamrun S. (1-0) u Marsaxlokk (4-2).
Għaldaqstant se jinżlu għal din il-logħba b’moral għoli. Rebħa għalihom tfisser li jibqgħu jissieltu għall-ewwel sitt postijet.
Sliema W. v Melita – Sliema Wanderers jimmiraw li jirritornaw għar- rebħ wara li ġew miżmuma fi draw ta’ 2-2 minn Gzira United.
Huma jiltaqgħu kontra Melita li kellhom bidu tant tajjeb u saħansitra taw l-impressjoni li se jagħtu battikata lil kull avversarju.
Iżda n-nuqqas ta’ esperjenza qed tkun fattur importanti biex huma qed jonqsu milli jilħqu l-objettivi tagħhom.
Huma ġejjin minn tliet telfiet wara draw kontra Floriana (3-3) u rebħa fuq Marsaxlokk (2-1).
Iż-żewġ timijiet mistennija jinżlu bl-aqwa formazzjoni possibbli.
