Qassis mid-Djoċesi Kattolika ta’ Saginaw tneħħa mill-ministeru tiegħu għal ħajtu kollha u hu se jgħix ħajja ta’ talb u penitenza. Dan wara allegazzjonijiet li hu abbuża sesswalment minn tfal żgħar.
Id-Djoċesi ta’ Saginaw fi stqarrija li ħarġet proprju ftit jiem ilu, iddikjarat li Fr Ronald Dombrowski kien tneħħa mill-ministeru pubbliku. Ismu fil-fatt qiegħed imniżżel fuq il-lista tad-djoċesi ta’ qassisin li tneħħew mill-ministeru jinħabba allegazzjonijiet ta’ abbużi sesswali.
L-allegazzjonijiet kontra Dombrowski jirreferu għall-perjodu tal-bidu tal-ministeru tiegħu. Kien f’Marzu tas-sena 2018, li raġel minn Virginia mar għand il-Pulizija u ddikjara li Dombrowski kien ħa grupp ta’ subien u ġuvintur lejn Florida fis-sena 1975. Ir-raġel qal li hu dak iż-żmienn kellu 13-il sena.
Skont ir-raġel, Fr Dombrowski li kien serva fil-Kappella ta’ San Stiefnu f’Saginaw, kien qallu biex jorqod miegħu u kien proprju hemmhekk li seħħew l-allegati abbużi.
Id-Djoċesi ta’ Saginaw kienet irċeviet żewġ każi oħra ta’ allegazzjonijiet ta’ abbużi sesswali kontra Dombrowski.
Il-qassis qal li hu ma jiftakarx l-allegazzjonijiet li qed jissemmew u talab li “jgħaddi ħajja ta’ talb u penitenza”.
