Qorti Iżraelita kkundannat ħaddiem tal-għajnuna Palestinjan għal 12-il sena ħabs wara li nstab ħati li għadda fondi lill-grupp militanti Hamas.
Mohammed Halabi, il-Kap tal-Uffiċċju ta’ World Vision ta’ Gaża, instab ħati f’Ġunju ta’ 13-il akkuża, fosthom li kien membru ta’ organizzazzjoni terroristika. Huwa kien ċaħad l-allegazzjonijiet kollha sa mill-arrest tiegħu fl-2016 u mistenni li jappella mis-sentenza.
L-Att ta’ Akkuża kif ippreżentata mill-Prosekuturi Iżraeljani kienet tgħid li r-raġel ta’ 44 sena allegatament għadda miljuni ta’ dollari ta’ għajnuna lill-Hamas, li l-Iżrael u l-forzi tal-punent iqisu bħala organizzazzjoni terroristika, kif ukoll ħadid, tubi tal-plastik u għodod għat-tħaffir biex jinbnew mini fuq il-fruntiera.
