Raġel ta’ 29 sena residenti Birżebbuġa jinsab fil-periklu tal-mewt wara li lbieraħ għall-ħabta tal-7:45 a.m, kien involut f’inċident tat-traffiku fDawret il-Gudja fil-Gudja
Minn stħarriġ illi sar, irriżulta li kienet seħħet ħabta bejn Skoda Fabia misjuqa minn raġel ta’ 50 sena residenti l-Gudja u Ford Fiesta, li f’dak il-ħin kienet wiefqa fil-ġenb tat-triq b’puncture.
Fil-ħin tal-impatt, raġel ta’ 29 sena residenti Birżebbuġa weġġa’ wara li nqabad bejn iż-żewġ vetturi.
Il-vittma ngħata l-għajnuna minn tim mediku, ittieħed l-Isptar Mater Dei b’ambulanza.
Membri mid-Dipartiment tal-Protezzjoni Ċivili kienu wkoll fuq il-post sabiex jassistu.
Il-Pulizija għaddejja bl-investigazzjonijiet fuq il-każ.
