Id-difensur ta’ Manchester United Raphael Varane stqarr li l-kummenti kontroversjali ta’ Cristiano Ronaldo fl-intervista famuża ‘affettwaw’ lill-players kollha.
F’intervista wiesa’ li għadha ma ġietx imxandra kollha, il-mira tal-attakkant internazzjonali Portugiż kienet diretta fuq il-coach, Erik ten Hag, u s-sidien tal-club, il-familja Glazier … u enfasizza d-dispjaċir tiegħu bit-trattament li ngħata mir-Red Devils.
Din l-intervista rrabjat lil kulħadd fil-kamp ta’ Manchester United hekk kif Varane issa sar l-ewwel player li tkellem fejn sostna li l-intervista ħalliet impatt negattiv fuq il-players kollha.
“Ovvjament taffettwana. Insegwu dak li qed jiġri u dak li qed jingħad,” huwa qal. “Nippruvaw nikkalmaw is-sitwazzjoni bil-mod tagħna, nippruvaw li ma nkunux involuti wisq fiha.”
Varane insista wkoll li ma jkollu l-ebda problema b’kull deċiżjoni li l-club jiddeċiedi li jieħu f’termini ta’ dixxiplina, li tista’ tvarja minn multa, sa bejgħ jew saħansitra t-terminazzjoni tal-kuntratt jekk Ronaldo jinsta ħati li kiser it-termini tal-ftehim tiegħu.”
“Dak li jiġri mal-midja jħalli effett qawwi fuq il-clubs. Din l-intervista kienet bomba tal-ħin li ħadet lil kulħadd b’sorpriża kbira.
“Dak li rridu huwa l-aħjar għat-team tagħna u għalhekk tkun xi tkun id-deċiżjoni, bħala players, naċċettawha u nagħtu l-aħjar tagħna.”
