Fl-aħħar aġġornament dwar is-sitwazzjoni tal-Covid-19 f’pajjiżna, l-awtoritajiet tas-saħħa ħabbru li l-każi attivi bħalissa huma ta’ 8,956.
Dan hekk kif mit-testijiet li saru matul l-aħħar 24 siegħa feġġew 1,337 każ ġdid filwaqt li 116 oħra ġew dikjarati bħala mfejqa mill-virus. Dan ifisser li pajjiżna għal darb’oħra rreġistra l-akbar ammont ta’ każi ġodda f’ġurnata sa mill-bidu tal-pandemija.
Fl-aħħar ġimgħa rriżultaw 6,644 każ ġdid ta’ Covid-19 u fiequ 676.
Fl-istess waqt l-ammont ta’ pazjenti li bħalissa jinsabu l-Isptar Mater Dei għall-kura minħabba l-Covid-19 huma 82, b’sitta minnhom li jinsabu fit-Taqsima tal-Kura Intensiva.
L-ammont ta’ mwiet baqa’ ta’ 476 hekk kif fl-aħħar 24 siegħa ma ġiet reġistrata l-ebda mewt marbuta mal-virus.
Il-programm ta’ vaċċinazzjoni baqa’ għaddej b’mod tajjeb hekk kif l-awtoritajiet tas-saħħa qalu li sal-bieraħ b’kollox ingħataw 1,052,035 doża tal-vaċċin. Minn dawn hemm 206,611 li huma dożi tal-booster.
