F’ċerimonja li saret f’Theatre du Chatelet, f’Pariġi, organizzata minn France Football taħt l-awspiċi tal-FIFA, l-attakkant internazzjonali Spanjol ta’ Manchester City, Rodrigo Hernandez Cascante, magħruf bħala Rodri, rebaħ il-Ballun tad-Deheb.
Din is-serata ġiet ippreżentata mill-eks player ta’ Chelsea, Didier Drogba u l-ġurnalista Sandy Heribert.
Bħalissa Rodri, 28 sena, qed jirkupra minn injury fil-ligamenti tal-cruciate iżda fl-istaġun li għadda huwa għen lil Manchester City jirbħu l-Premier League għar-raba’ darba konsekuttiva filwaqt li fis-sajf għen ukoll lil Spanja jirbħu l-Euro 2024.
Fit-tieni u fit-tielet postijiet spiċċaw il- players ta’ Real Madrid, il-Brażiljan Vinicius Jr u l-Ingliż Jude Bellingham.
Sadanittant, il-kamp ta’ Real Madrid ibbojkottja din iċ-ċerimonja meta sar magħruf li l-premju kien se jingħata lil Rodri u mhux lil Vinicius Jr.
Il-Ballun tad-Deheb jivvutaw għalih 100 ġurnalist minn dawk il-pajjiżi li huma rrankjati fl-ogħla livelli tal-FIFA.
Ta’ nota huwa l-fatt li għall-ewwel darba f’20 edizzjonijiet, il-Portugiż Cristiano Ronaldo u l-Arġentin Lionel Messi, ma kienux fil-lista mqassra ta’ 30 player.
Messi (bi tmienja) u Ronaldo (ħamsa) ilhom jiddominaw dan il-konkors iżda issa l-era tagħhom ġiet fi tmiemha.
Fl-unuri l-oħra, iż-żagħżugħ internazzjonali Spanjol ta’ Barcelona, Lamine Yamal, rebaħ il-Kopa Trophy li ġiet ippreżentata mill-Olandiż, Ruud Gullit.
Huwa kien segwit mit-Tork ta’ Real Madrid, Arda Guler, u l-Ingliż ta’ Manchester United, Kobbie Mainoo.
Real Madrid rebħu l-unur tal-Aqwa Club wara li rebħu l-UEFA Champions League u l-Kampjonat Spanjol.
Il-goalkeeper Arġentin ta’ Aston Villa, Emiliano Martinez, rebaħ il-Yashin Trophy.
L-Ingliż Harry Kane ta’ Bayern Munich u l-Franċiż Kylian Mbappe ta’ Paris SG (illum ma’ Real Madrid), rebħu l-Gerd Muller Trophy bħala l-Aqwa Skorers tal-istaġun li għadda … bi 52 goals fil-kompetizzjoijiet kollha.
It-Taljan Carlo Ancelotti (Real Madrid) u l-Ingliż Emma Hayes (Stati Uniti/Chelsea) rebħu l-unur tal-Aqwa Coaches maskili u femminili rispettivament.
L-attakkanta Spanjola tat-team Messikan Tigres UANL, Jennifer Hermoso, rebħet is-Socrates Award wara li għamlet xogħol umanitarju mill-aktar eżemplari.
L-attakkanta Spanjola ta’ Barcelona, Aitana Bonmati, rebħet il-Ballon D’Or tan-Nisa, fejn rebħet il-UEFA Champions League u l-Kampjonat Spanjol … għat-tieni sena konsekuttiva … wara li għamlet dan il-kollega tagħha Alexia Putellas fis-sentejn preċedenti.
Finalment it-team ta’ Barcelona tan-Nisa rebaħ l-unur tal-Aħjar Club tas-Sena wara li rebħu l-UEFA Champions League u l-Kampjonat Spanjol.
