Roberto Mancini stqarr li l-ewwel taqsima tat-telfa ta’ 2-0 tal-Italja kontra l-Belġju ma laħqitx l-aspettattivi mixtieqa, iżda sostna li t-team tiegħu għamel prestazzjoni ferm aħjar wara l-mistrieħ.
Il-Belġju ħadu l-vantaġġ permezz ta’ Mika Godts, li skorja wara azzjoni tajba, filwaqt li Dodi Lukebakio rdoppja l-iskor b’kontrattakk wara żball tal-Italja.
Mancini qal li fl-ewwel taqsima l-Belġju kien l-aħjar team, iżda fit-tieni taqsima l-Italja ħadu l-inizjattiva u bdew joħolqu diversi opportunitajiet.
Huwa sostna li l-Italja kellhom erba’ jew ħames ċansijiet biex jiksbu d-draw u żammew lill-avversarji taħt pressjoni sakemm wasal it-tieni goal.
Minkejja t-telfa, Mancini faħħar lill-Belġju bħala team b’saħħtu u qal li dan huwa parti mill-football. It-telfa kienet bidu diffiċli għat-tieni perjodu tiegħu fit-tmexxija tat-team nazzjonali Taljan.
Il-partitarji Taljani esprimew id-diżappunt tagħhom b’ħafna tisfir fil-mistrieħ u fi tmiem il-logħba. Mancini qal li meta titlef, huwa normali li l-partitarji juru d-diżappunt tagħhom.
Alessandro Romano għamel id-debutt tiegħu mal-Italja, wara li għażel li jirrappreżenta lit-Taljani minflok lill-Isvizzera, filwaqt li Momo Zoma u Issa Doumbia għamlu d-debutt tagħhom fit-tieni taqsima.
Wara r-rebħa ta’ Franza fuq it-Turkija, l-Italja tinsab fl-aħħar tal-grupp minħabba d-differenza tal-goals.
