Malta …………….36
Sweden …………..34
It-team nazzjonali Malti tar-rugby kiseb waħda mill-aktar rebħiet spettakolari f’dawn l-aħħar snin meta s-Sibt waranofsinhar skorja 17-il punt mingħajr risposta fl-aħħar 12-il minuta biex għeleb lill-Isvezja bl-iskor ta’ 36-34, quddiem 1,600 spettatur fit-Tony Bezzina Stadium, f’Raħal Ġdid.
Ftit aktar minn 20 minuta mit-tmiem, Malta kienet qed titlef 19-34 u kollox kien jidher li l-Isvediżi kienu se joħorġu rebbieħa. Madankollu, dak li seħħ wara kien rimonta straordinarja li żammet lill-pubbliku Malti fuq ix-xwiek sal-aħħar sekonda, meta penalty mill-Isvezja li seta’ jagħtihom ir-rebħa spiċċa barra.
Bidu mill-aqwa
Wara biss tliet minuti logħob, il-fly-half Robert Holloway fetaħ l-iskor għal Malta bi try, filwaqt li Christopher Dudman żied iż-żewġ punti mill-konverżjoni biex Malta marret 7-0 minn fuq.
L-Isvezja wieġbet permezz tal-captain Axel Kalling-Smith biex ġabet l-iskor indaqs, 7-7, iżda Malta reġgħet ħadet il-kontroll. Il-hooker Ryan Connolly skorja t-tieni try għat-tim Malti, li ġie kkonvertit minn Dudman, qabel ma Holloway skorja t-tieni try personali tiegħu fit-22 minuta biex Malta fetħet vantaġġ ta’ 19-7.
L-Isvezja rrispondiet permezz ta’ tries minn Daniel Cutler u Samuel Ekfeldt, b’dan tal-aħħar jiskorja proprju ftit qabel tmiem l-ewwel taqsima. B’hekk, Malta daħlet tistrieħ b’vantaġġ minimu ta’ 19-17.
L-Isvezja tieħu l-kontroll
It-tieni taqsima bdiet ħażin għal Malta. Dudman falla penalty fil-bidu tagħha, u ftit wara l-Iżvediżi skorjaw tliet tries f’inqas minn għaxar minuti.
L-ewwel kien Jack Tatu Robertsson li skorja u kkonverta t-try tiegħu stess, qabel ma s-sostitut Robin Fransson żied try ieħor. Ekfeldt imbagħad skorja t-tieni try personali tiegħu biex l-Isvezja fetħet vantaġġ ta’ 15-il punt, bl-iskor jitla’ għal 34-19 fis-57 minuta.
Rimonta spettakolari
Il-players ta’ quddiem ta’ Malta żiedu l-pressjoni fuq l-avversarji u l-Isvediżi bdew juru sinjali ta’ diffikultà. Fis-67 minuta, plejer tal-Isvezja ntbagħat temporanjament barra mill-ground, u minuta wara r-referee ta penalty try lil Malta wara li l-Isvediżi waqqfu azzjoni li x’aktarx kienet se twassal għal try. B’hekk Malta kisbet seba’ punti f’daqqa u naqqset l-iżvantaġġ għal 26-34.
Fis-70 minuta waslet it-tieni karta safra għall-Isvezja, biex il-viżitaturi kellhom ikomplu b’13-il plejer biss.
Malta approfittat mill-ispazju żejjed u fis-73 minuta s-sostitut Harry Collins qasam il-linja biex skorja try importanti. Dudman ikkonverta u naqqas id-distakk għal punt wieħed biss, bl-iskor ikun 33-34.
Meta kien għad fadal żewġ minuti, Malta rebħet penalty f’pożizzjoni tajba. Dudman ħa r-responsabbiltà, żamm il-kalma u bagħat il-ballun bejn il-lasti biex Malta marret fil-vantaġġ 36-34 għall-ewwel darba mit-tmiem tal-ewwel taqsima.
Fl-aħħar sekondi, l-Isvezja ngħataw penalty li, kieku ġie skorjat, kien jagħtiha r-rebħa. Madankollu, il-ballun spiċċa barra, ir-referee saffar it-tmiem u l-pubbliku f’Raħal Ġdid kien f’dellirju ta’ ferħ.
Malta tibqa’ fil-quċċata tal-klassifika
Din kienet it-tielet rebħa minn tliet logħbiet għal Malta, li b’hekk baqgħet fil-quċċata tal-klassifika tar-Rugby Europe Men’s Trophy bi 12-il punt, wieħed aktar mill-Ġermanja.
Iċ-Ċekja tinsab viċin b’disa’ punti u logħba inqas, filwaqt li l-Isvezja niżlet fir-raba’ post b’seba’ punti.
Bil-ġlieda għat-titlu għadha miftuħa u l-klassifika daqshekk bilanċjata, kull punt se jkun importanti fil-logħbiet li fadal.
Skorers
Malta (36): Tries: Robert Holloway (2), Ryan Connolly, Harry Collins; Penalty try; Conversions: Christopher Dudman (3); Penalty: Christopher Dudman.
Sweden (34): Tries: Samuel Ekfeldt (2), Axel Kalling-Smith, Daniel Cutler, Jack Tatu Robertsson, Robin Fransson; Conversions: Jack Tatu Robertsson (2).
Ammonitit: Mark Davey (Malta, 33′); David Towler (Sweden, 68′); Armir Kozhani (Sweden, 70′).
Timijiet:
| No. | Malta | No. | Sweden |
| 1 | Rhodri Apsee | 1 | Viktor Cordes |
| 2 | Ryan Anthony Connolly | 2 | Armir Kozhani |
| 3 | Joshua Cilia | 24 | Maxim Galet |
| 4 | Mark Davey | 4 | Daniel Cutler |
| 5 | Joseph Greaves (captain) | 5 | Elias Granath |
| 6 | Louis Mifsud | 6 | Anthony Rafael |
| 7 | George Strickland | 7 | Nils Granath |
| 8 | Owen Jon Vassallo | 8 | Christopher Vannerberg |
| 9 | Thomas Holloway | 9 | Jack Tatu Robertsson |
| 10 | Robert Holloway | 10 | Joar Blanck |
| 11 | Zarrin Galea | 11 | Setanta MacAodha |
| 12 | Christopher Dudman | 12 | Axel Kalling-Smith (captain) |
| 13 | Brendan Dalton | 13 | Hannes Nylén |
| 14 | Adam Kelly | 14 | Samuel Ekfeldt |
| 15 | John Terence Connolly | 15 | Mattias Nilsson |
Replacements
| No. | Malta | No. | Sweden |
| 16 | Harry Collins | 16 | Harry O’Reilly |
| 17 | Alexander Jonathan Hignett | 17 | Marc Duvel |
| 18 | Samuel David Eden | 18 | Gustav Lindberg |
| 19 | Blake Scott | 22 | Daniel Roos |
| 20 | Luke Watts | 19 | David Towler |
| 21 | Cameron Sultana | 21 | Kristian Thomson |
| 22 | Jean Scholey | 20 | Karl Nilsson |
| 23 | Jethro Zammit Randich | 23 | Robin Fransson |
Staff tekniku ta’ Malta: Head Coach: Ignatius Philippus Wilhelm Pretorius; Assistant Coach: Frederick Jacobus Espag; Manager: Nicholas Azzopardi; Performance Analyst: Mark De Brincat; S&C: Samuel Ian Portelli; Physio: Pauline Fenech.
Staff tekniku tal-Isvezja: Head Coach: Alexander Laybourne; Manager: Pasi Niemela; Media Manager: Gunnar Mattiasson; Physios: Monica Häljestig, Jane Jaråker.
Uffiċjali tal-logħba: Referee: Ethan Glass (Switzerland); AR1: Philip Manolopoulos (Austria); AR2: Rimantas Zeringis (Lithuania); Match Commissioner: Eliseo Patron-Costas (Spain).
