Il-komunità fil-qasam tad-divertiment f’Malta tinsab f’luttu wara l-aħbar tal-mewt għall-għarrieda tad-DJ magħruf Ryan Spiteri, li miet fl-età ta’ 47 sena.
L-aħbar ħasdet mhux biss lil dawk li kienu jaħdmu miegħu, iżda wkoll lill-eluf ta’ segwaċi, dilettanti tal-mużika, organizzaturi ta’ festi u attivitajiet, artisti lokali u membri ta’ għaqdiet tal-banda li matul is-snin kellhom l-opportunità jaħdmu miegħu jew igawdu s-servizzi tiegħu.
Spiteri kien wieħed mill-aktar DJs popolari f’Malta u ismu kien sinonimu ma’ divertiment ta’ kwalità, enerġija pożittiva u passjoni bla qies għall-mużika partikolarment dik tas-snin disgħin. Għal ħafna, il-vuċi tiegħu fuq ir-radju u l-preżenza tiegħu fuq il-palk kienu parti mill-ħajja ta’ kuljum. Kien kapaċi jgħaqqad ġenerazzjonijiet differenti permezz tal-mużika u dejjem kien magħruf għall-entużjażmu li kien iġib miegħu f’kull avveniment.
L-investigazzjonijiet tal-Pulizija stabbilew li Ryan Spiteri u l-mara li kienet miegħu mietu b’avvelenament aċċidentali bil-monossidu tal-karbonju, filwaqt li għadha għaddejja inkjesta maġisterjali sabiex jiġu stabbiliti ċ-ċirkostanzi kollha tal-każ.
L-aħbar wasslet għal mewġa kbira ta’ messaġġi ta’ niket fuq il-midja soċjali. Kull min kellu kuntatt miegħu ħass il-bżonn isellem il-memorja tiegħu u jfakkar il-karattru, il-professjonalità u l-qalb kbira li kien juri ma’ kulħadd.
Ryan Spiteri beda l-vjaġġ tiegħu fid-dinja tal-mużika minn età relattivament żgħira. Tul is-snin bena reputazzjoni soda bħala DJ li kien jaf jaqra l-atmosfera ta’ kull avveniment u jagħżel il-mużika t-tajba għall-mument it-tajjeb. Il-karriera tiegħu ħaditu f’għadd ta’ stabbilimenti u avvenimenti ewlenin madwar Malta.
Għal ħafna snin kien wieħed mill-uċuħ magħrufa ta’ Gianpula Village, fejn kien deejay residenti u animatur ta’ serati li baqgħu mnaqqxa fil-memorja ta’ ġenerazzjoni sħiħa ta’ dilettanti tal-ħajja ta’ billejl. Il-kapaċità tiegħu li jżomm dancefloor mimlija kienet waħda mill-aktar kwalitajiet li kienu jiddistingwuh.
Minbarra x-xogħol tiegħu bħala DJ, Ryan kien ukoll preżentatur tar-radju. Ħadem ma’ diversi stazzjonijiet, fosthom Vibe FM u ONE Radio, fejn permezz tal-programm popolari “Rewind” kompla jsaħħaħ il-popolarità tiegħu. Il-programm kien joffri taħlita ta’ suċċessi li għamlu storja fil-mużika u kien segwit minn udjenza numeruża.
Tul il-karriera tiegħu kien magħruf ukoll għas-sostenn kontinwu li ta lill-artisti Maltin. Kien wieħed minn dawk li ma kienx jiddejjaq jippromwovi produzzjonijiet lokali, jagħti spazju lil talent ġdid u jħeġġeġ lill-kantanti Maltin jemmnu fil-ħolm tagħhom.
Fost l-ewwel persuni li sellmu l-memorja tiegħu kien hemm Matthew De Giorgio, sid Gianpula Village, li qal li Ryan kien ilu jaħdem magħhom għal aktar minn 16-il sena u li maż-żmien sar parti mill-familja.
De Giorgio rrakkonta kif matul l-aħħar snin kien spiss jistaqsih kif kien qiegħed iħossu u Ryan dejjem kien iwieġbu li kien tajjeb. Qal ukoll li sa ftit sigħat qabel it-traġedja kienu għadhom qed jitkellmu dwar avveniment li kien ippjanat għal Ottubru u jiddiskutu ideat ġodda biex ikun suċċess.
Huwa ddeskrivieh bħala persuna professjonali, pożittiva u dedikata, li dejjem kienet tagħti l-aqwa tagħha għal kull attività.
Il-komunità tad-DJs Maltin ingħaqdet f’messaġġ wieħed ta’ niket.
Id-DJ u producer Cathy K Attard fakkret wieħed mill-isbaħ mumenti li qasmet miegħu meta Ryan attenda wieħed mill-avvenimenti tagħha u b’ġest ta’ rispett ħa l-mikrofonu biex isellem lill-pubbliku.
Il-kantant Fabrizio Faniello kiteb messaġġ emozzjonanti fejn qal li qalbu nqasmet bl-aħbar tat-telfa ta’ Ryan.
Faniello fakkar kif Ryan kien ħafna aktar minn DJ. Fil-fatt hu ddeskrivieh bħala ruħ tajba, persuna li taħdem bla waqfien u ħabib sinċier li dejjem emmen fil-mużika Maltija. Qal li qatt mhu se jinsa kif Ryan kien idoqq il-kanzunetti tiegħu u jagħti spazju lill-artisti lokali.
Huwa sostna li Ryan kellu don speċjali li jgħaqqad lin-nies permezz tal-mużika, jimla d-dance floor u joħloq atmosfera li tibqa’ f’moħħ kull min kien preżenti.
F’messaġġ ieħor mimli emozzjoni, id-DJ J Joy kiteb li kull darba li jerġa’ jdoqq il-mużika se jiftakar f’Ryan u jimmaġinah jiżfen fis-smewwiet, filwaqt li sostna li l-memorji li ħoloq se jibqgħu jgħixu għal dejjem.
Numru ta’ kollegi u ħbieb tkellmu dwar il-bniedem li kien lil hinn mill-palk.
Kollega tiegħu fakkret kemm kienu jqattgħu ħin flimkien fuq il-post tax-xogħol, fost daħk, telefonati u mumenti umoristiċi. Hija qalet li l-vuċi tiegħu kienet tinstema’ kullimkien u li dejjem kien lest idaħħak lil dawk ta’ madwaru.
Barbier li għal seba’ snin kien jieħu ħsiebu qal li dak li beda bħala relazzjoni bejn klijent u barbier inbidel f’ħbiberija vera mibnija fuq rispett reċiproku.
Huwa qal li Ryan kien jidħol fil-ħanut dejjem bi tbissima u li l-konversazzjonijiet tagħhom kienu saru parti mir-rutina ta’ kull ġimgħa. Żied li l-ħanut mhux se jibqa’ l-istess mingħajru.
Il-popolarità ta’ Ryan ma kinitx limitata għall-clubs u r-radju. Kien ukoll wiċċ magħruf ħafna waqt il-festi Maltin.
Diversi għaqdiet tal-banda ppubblikaw messaġġi ta’ kondoljanzi u ritratti li jfakkru l-preżenza tiegħu fil-marċi tal-festi.
L-Għaqda Madonna tal-Grazzja Banda San Mikiel ta’ Ħaż-Żabbar qalet li Ryan kien sostenitur tal-għaqda u li dejjem se jibqgħu jiftakru fil-mumenti sbieħ li qasmu flimkien waqt il-festa.
Il-Kumitat tal-Birkirkara Duke of Connaught’s Own Band Club iddeskrivieh bħala wieħed mill-aktar DJs popolari fil-pajjiż u qal li kull meta kien jieħu sehem fl-attivitajiet tagħhom kien kapaċi jxerred atmosfera ta’ ferħ fost dawk kollha preżenti.
Id-DJ veteran Alex Grech qal li l-aħbar ixxukkjat lill-komunità kollha tad-divertiment.
Huwa spjega li kien ilu jaf lil Ryan għal aktar minn tletin sena minn żmien Capital Radio, u aktar tard reġgħu ħadmu flimkien fuq ONE Radio.
Grech irrakkonta li minkejja li kull wieħed kellu stil differenti ta’ mużika u mod differenti kif iħares lejn ix-xena tad-divertiment, dejjem kien hemm rispett reċiproku bejnithom.
Qal li Gianpula kienet it-tieni dar tagħhom u li Ryan ħalla vojt enormi fil-komunità tal-clubbing Malti.
Tul il-karriera tiegħu, Ryan kien preżenza kostanti fil-festi tal-irħula, fil-clubs, fuq il-frekwenzi tar-radju u f’għadd ta’ attivitajiet madwar Malta. Kien jemmen li l-mużika għandha s-saħħa tgħaqqad lin-nies u din il-filosofija kienet tidher f’kull prestazzjoni tiegħu.