Raġel kien ikkundannat sentejn ħabs sospiżi għal erba’ snin wara li nstab ħati li kellu argument ma’ raġel ieħor ġewwa San Ġiljan u li allegatament waqt l-istess argument, għamel użu minn lembuba.
Fil-Qorti, il-Prosekuzzjoni spjegat li l-każ imur lura għal bidu ta’ Awwissu taa’ erba’ snin ilu. L-imputat kien akkużat li ħebb għal vittma u li kiser il-paċi pubblika.
Meta kien mitkellem mill-Pulizija, il-vittma qal li lemaħ persuna li riedet tipparkja l-vettura quddiem il-garaxx u peress li kien hemm lavrant ipparkjat mar jgħidlu biex iċaqlaq il-karozza.
Ingħad li kien hawnhekk fejn l-argument eskala u li allegatment ħareġ il-lembuba mid-dar u allegatament beda jagħti biha lill-vittma, bil-konsegwenza li dan kellu jittieħed l-Isptar għal iktar kura.
Il-Maġistrat Frendo Dimech qalet li kuntrarjament għal dak li qal lill-Pulizija, kien proprju l-imputat li hekk kif il-vittma għadda minn warajh warrbu bil-minkeb u tefgħu fuq vann ipparkjat mal-bankina.
Qalet li kieku verament l-imputat inħasad ma kienx imur jattakka bniedem darbtejn imma jidħol għall-kenn u s-sigurtà ta’ daru.
Minbarra s-sentenza ta’ ħabs sospiża, il-Qorti ordnat lil imputat jagħti lill-vittma kumpens ta’ €1,000 u ħarġet ordni ta’ trażżin għal perjodu ta’ tlett snin biex tipproteġi lill-vittma.