Tamar Elabkidze ta’ 32 sena mill-Ġeorġja, iżda residenti f’San Pawl il-Baħar, ingħatat sentenza sospiża wara li ammettiet li serqet ħwejjeġ, żraben u basket minn stabbiliment f’Tas-Sliema.
Il-każ seħħ nhar is-26 ta’ Diċembru li għadda, għall-ħabta ta’ bejn is-6.00 p.m. u t-8.00 p.m. fi Triq ix-Xatt, kantuniera ma’ Triq it-Torri.
Għall-finijiet ta’ piena, il-Qorti kkunsidrat in-natura tar-reat dedott fil-konfront tal-imputat, liema reat, għad li l-ammont mhux eżorbotanti, żgur li ma jistax jitqies bħala li huwa trivjali.
Ikkunsidrat ukoll li l-imputata għandha fedina penali netta u li hija rreġistrat ammissjoni fi stadju bikri tal-proċeduri.
Kien għal dawn ir-raġunijiet li l-Qorti, preseduta mill-Maġistrat Gabriella Vella, sabitha ħatja tal-akkużi u kkundannatha għal sena priġunerija sospiżi għal sentejn.
Il-Qorti ordnatilha wkoll sabiex tħallas lill-vittmi f’dawn il-proċeduri s-somma ta’ €340.43ċ.
